Abagore bari muri Siporo y’u Rwanda  baganiriye ku bibazo bahura nabyo n’uko byakemuka

Abagore bari muri Siporo y’u Rwanda  baganiriye ku bibazo bahura nabyo n’uko byakemuka

Imvaho Nshya

May 20, 2022

Kuva taliki 19 kugeza 20 Gicurasi 2020, Komite Olempike y’u Rwanda binyuze muri Komisiyo y’abagore ku nkunga ya Olympic Solidarity hateguwe  amahugurwa y’iminsi 2 “Smart Women-Smart Sport”  mu rwego rwo  kurebera hamwe ibibazo byugarije umugore muri siporo nk’ihohoterwa, umubare ukiri muto  mu nzego zifata ibyemezo muri siporo n’ibindi.

Aya mahugurwa arimo kubera muri Centre d’Acceuil Bonne Espérance -Kicukiro yitabiriwe n’abantu 38 barimo abagore 33 bava mu mashyirahamwe y’imikino, abakinnye imikino Olempike ndetse n’ibigo biri muri gahunda  ISONGA “Sports Centers of Excellence in Schools”.

Umwe mu bitabiriye aya mahugurwa, Kayitesi Zaina akaba abarizwa mu ishyirahamwe ry’imikino mu mashuri mu Rwanda atangaza ko uyu mwanya  bawishimiye kuko barebeye hamwe uruhare rw’umugore mu iterambere rya siporo ndetse banarebera hamwe  ihohoterwa rishobora gukorerwa umwana w’umukobwa  bikamubuza gukomeza gahunda y’iterambere rya siporo . Ikindi ni uburyo bwo  kureba ibijyanye no gushaka impano, uko bikorwa n’uko byatanga  umusaruro.

Kayitesi Zaina

Agaruka ku mahirwe abagore bafite muri siporo, Kayitesi yavuze ko hambere bihezaga ariko ubu bigenda bihinduka nubwo bikenewe gukomeza gushyirwamo ingufu kugira ngo abagore bibone muri siporo zose.

Uwamahoro Ariane ukuriye Komisiyo y’abagore muri Komite Olempike y’u Rwanda, avuga ko bateguye aya mahugurwa  nyuma yo kubona ko hari ibikenewe gukorwa  kuko hari ibikibangamiye iterambere rya siporo y’abagore birimo ihohoterwa mu buryo butandukanye n’ibindi.

Yakomeje avuga ko  hari ikibazo cyo gushaka impano z’abakiri bato ndetse no kujya mu nzego zifata ibyemezo bigatuma siporo mu cyiciro cy’abagore idatera imbere.

Uwamahoro Ariane ukuriye Komisiyo y’abagore muri Komite Olempike y’u Rwanda

Uwamahoro avuga ko igikenewe cyane gukorwa ari uguhindura imyumvire kuko  ari yo ituma umuntu asubira inyuma.  Akomeza avuga ko  bashishikariza abanyuze muri siporo gufasha barumuna babo kuko nibazamuka babarebeho  bizatuma bazamura urwego bityo siporo y’abagore  igere ku rwego rushimishije.

Visi Perezida wa kabiri wa Komite Olempike y’u Rwanda, Umutoni  Salama  yavuze ko iyi gahunda yateguwe kugira ngo harebwe uko izi mbogamizi abagore bahura nazo muri siporo zavaho kugira ngo na bo bagere ku rwego rwiza.

Visi Perezida wa kabiri wa Komite Olempike y’u Rwanda, Umutoni  Salama  

Yakomeje avuga ko bitagera ku rwego rw’abagabo aka kanya ariko ko nihabaho ubufanye hari ikizahinduka abagore nabo bakagera ku rwego rushimishije muri siporo.

Komite Olempike y’u Rwanda mu rwego rwo gufasha abanyamuryango bayo  ari yo mashyirahamwe y’imikino mu Rwanda  mu guteza imbere imikino bafite mu nshingano, hategurwa amahugurwa atandukanye hagamijwe guteza imbere urwego rw’imiyoborere, imitoreze, imisifurire, uburinganire muri siporo ndetse na gahunda  zigenerwa gufasha abakinnyi bafite impano.

Ibi bikaba bikorwa hagamijwe guteza imbere siporo y’u Rwanda muri rusange ku bufatanye na Ministeri ya Siporo.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA