Ikigo cy’Igihugu cy’Ibarurishmibare mu Rwanda cyatangaje ko amafaranga u Rwanda rwinjije hagati y’Ugushyingo 2025 na Mutarama 2026, aturutse muri serivisi z’ingendo zikorwa n’Abanyamahanga basura agera kuri miliyari  236 z’amafaranga y’u Rwanda (miliyoni 161.5 z’amadolari ya Amerika). 

Muri ayo mafaranga asaga miliyari 199 z’amafaranga y’u Rwanda ( miliyoni 136.7 z’amadolari y’Amerika),  yakoreshejwe n’abanyamahanga binjiye mu Rwanda bakoresheje indege.

Ni raporo NISR yashyizwe ahagaragara kuri uyu wa Gatatu tariki ya 4 Werurwe 2026, aho yatagaje ko hakurikijwe impamvu y’urugendo, ubukerarugendo bwo kuruhuka bwinjirije u Rwanda miliyoni 65USD. Muri iki cyiciro, amafaranga aturuka ku gusura ingagi yihariye 71.4% by’ayo mafaranga yose.

Hakurikijwe uturere, abashyitsi baturutse muri Amerika ya Ruguru ni bo bakoresheje amafaranga menshi, agera kuri miliyoni 40.8USD.

NISR igaragaza ko  amafaranga yakoreshejwe n’abanyamahanga binjiye mu Rwanda banyuze ku mipaka y’ubutaka (land borders) yageraga kuri miliyoni 24.9USD. 

Impamvu nyamukuru y’izo ngendo yari ugusura inshuti n’imiryango, byinjije miliyoni 11.3 USD, aho abaturutse muri Afurika y’Iburasirazuba (EAC) ari bo bakoresheje amafaranga menshi angana na miliyoni 19.7 USD.

Uko Abanyarwanda bakoresheje amafaranga mu bihugu bajyamo

Hagati y’Ugushyingo 2025 na Mutarama 2026, amafaranga u Rwanda rwakoresheje mu mahanga kuri serivisi z’ingendo yageraga kuri miliyoni 95.9 z’amadolari y’Amerika (asaga miliyari 138 z’Amafaranga y’u Rwanda, muri ayo ayo Abanyarwanda bakoresheje indege bakoresheje miliyoni 64.4 USD (miliyari 94 Frw).

NISR igaragaza ko impamvu nyamukuru y’izo ngendo yari ubucuruzi, bwatwaye miliyoni 22.2 USD (asaga miliyari 32 Frw). 

Hakurikijwe aho bajyaga, EAC ni yo yakiriye amafaranga menshi, angana na miliyoni 53.9 USD (asaga miliyari 77 Frw).

Ni mu gihe Abanyarwanda bakoze ingendo banyuze ku mipaka y’ubutaka bakoresheje miliyoni 31.5 USD (asaga miliyari 47 z’amafaranga y’u Rwanda), aho impamvu nyamukuru yari ugusura inshuti n’imiryango, byatwaye miliyoni 12.4 USD (asaga miliyari 18 z’amafaranga y’u Rwanda).

NISR igaragaza ko mu mwaka wa 2024, urwego rw’ubukerarugendo rwinjirije u Rwanda  amadorari ya Amerika agera kuri miliyoni 647, (arenga miliyari 932 Frw); aho  raporo y’Urwego mpuzamahanga rukora ubushashatsi ku ngendo ku isi (World Travel and Tourism Council) yagaragaje ko muri uwo mwaka  uru rwego rwatanze umusanzu ungana na 9.8% ku bukungu bw’igihugu.

Ba uwa mbere mu kumenya amakuru agezweho!!!