Ikigo cy’Igihugu gishinzwe Ibizamini n’Ubugenzuzi bw’Amashuri, NESA, gitangaza ko u Rwanda rwiteguye kwakira ibizava muri gahunda Mpuzamahanga yo Gusuzuma Ubumenyi n’Ubushobozi by’Abanyeshuri (PISA) ya 2025.

Ni isuzuma ryitabiriwe n’abanyeshuri 7,455 bo mu bigo by’amashuri. Biteganyijwe ko amanota azatangazwa mu kwezi kwa Nzeri 2026.

Abanyeshuri 7,455 bitabiriye isuzuma ryakozwe mu 2025, barikoze kuva ku itariki 27 Mata kugeza ku ya 7 Kamena.

Isuzumabumenyi rya PISA rikorwa mu byiciro bibiri birimo icy’igerageza n’icy’isizuma nyirizina.  Abanyeshuri basuzumwa ubumenyi n’ubushobozi bafite mu gusoma, imibare ndetse no muri Siyansi.

Umuyobozi Mukuru wa NESA, Dr. Bernard Bahati aherutse gutangaza ko intego y’iyi gahunda ari ugusuzuma ibyo abanyeshuri bashoboye bityo bigaherwaho hakorwa igenemigambi rinoze.

U Rwanda rwungukira kuri PISA nk’uko bisobanurwa n’ubuyobozi bwa NESA. Bugira buti: “PISA idufasha kunoza integanyanyigisho n’ingamba zo kwigisha, gutanga ibipimo mpuzamahanga byifashishwa mu kugereranya urwego rw’imyigire y’abanyeshuri ndetse no gufasha abayobozi gufata ibyemezo bya politiki bigamije kongera ireme ry’uburezi.”

Uruhare rwa Guverinoma n’inzego z’uburezi mu Rwanda, zikoresha ibyavuye muri PISA hagamijwe guteza imbere politiki y’uburezi. Ni mu gihe ibigo by’amashuri n’abarimu baba basabwa gutegura abanyeshuri gutekereza cyane no kugira ubumenyi ku gukemura ibibazo.

NESA igaragaza ko uruhare rw’ababyeyi n’umuryango nyarwanda muri rusange, ari ugushyigikira abanyeshuri mu rugendo rw’imyigire yabo.

Ikigo cy’Igihugu gishinzwe Ibizamini n’Ubugenzuzi bw’Amashuri, gishishikariza abanyeshuri, abarimu, abayobozi b’amashuri n’abandi bafatanyabikorwa kugira imyumvire myiza kuri PISA no gukomeza kumenya amakuru ndetse no kugira uruhare mu biganiro bigamije kunoza ireme ry’uburezi.

Mu 2000 ni bwo iryo suzuma ryatangiye gukorwa, aho ryari risanzwe rikorwa buri nyuma y’imyaka itatu. PISA ikorwa buri nyuma y’imyaka itatu mu bihugu birenga 80 hirya no hino ku Isi.

PISA yashyizweho n’Umuryango Mpuzamahanga w’Ubukungu, Ubufatanye n’Iterambere (OECD) mu 1997, hagamijwe gupima ubushobozi bw’abanyeshuri mu gukoresha ubumenyi bwabo mu buzima busanzwe, harebwa ibitekerezo byabo hamwe n’ubuhanga bafite bwo gukemura ibibazo.

Ba uwa mbere mu kumenya amakuru agezweho!!!