Abaserukiye u Rwanda mu mikino Olempike bahuguwe ku   mikino ikinwa  mu bukonje

Abaserukiye u Rwanda mu mikino Olempike bahuguwe ku   mikino ikinwa  mu bukonje

Imvaho Nshya

April 4, 2022

Abakinnyi baserukiye u Rwanda mu mikino Olempike mu mikino itandukanye bafite ishyirahamwe ribahuza “Rwanda Olympians Association (ROA)”. Binyuze muri iri huriro, taliki 03 Mata 2022 bahuguwe ku mikino Olempike ikinwa mu gihe cy’ubukonje “Winter Olympic Games”.

Iyi mikino ubusanzwe yitabirwa n’ibihugu bibamo ubukonje bwinshi aho nta gihugu cy’Afurika kirimo ariko ubu hatangiye  gahunda yo kumenyekanisha iyi mikino kuri uyu mugabane  ku buryo abakinnyi bajya kwitoreza mu bihugu bibamo urubura cyangwa abakinnyi bafite inkomoko mu bihugu by’Afurika baba mu bihugu bibamo urubura bakazajya baserukira ibihugu byabo.

Muri iyi gahunda rero, ishyirahamwe ry’abaserukiye u Rwanda mu mikino Olempike “ROA”   riri mu mashyirahamwe 17 muri Afurika yahawe ubufasha mu mushinga wo kumenyekanisha ibyerekeye imikino Olempike iba mu gihe cy’ubukonje “Winter Olympic Games”.

Kuva mu 1984 u Rwanda rwitabira imikino Olempike iba mu gihe cy’impeshyi “Summer Olympic Games”. Abaserukiye u Rwanda  bahawe amahugurwa kuri  “Winter Olympic Games” kugira ngo bagire uruhare mu kuyimenyekanisha.

Umuyobozi ushinzwe ibikorwa muri Komite Olempike y’u Rwanda, Mukundiyukuri Jean de Dieu yasobanuriye  abaserukiye u Rwanda mu mikino Olempike inkomoko y’iyi mikino, uburyo ikinwa ndetse n’icyo bakora kugira ngo u Rwanda ruzayitabire.

Umuyobozi ushinzwe ibikorwa muri Komite Olempike y’u Rwanda, Mukundiyukuri Jean de Dieu

Yakomeje avuga ko nubwo u Rwanda rutari mu bihugu bibamo urubura kimwe n’ibindi bihugu by’Afurika hari ibifata gahunda yo kwitoreza  hanze y’igihugu mu bihugu bibamo urubura nka Koreya y’Epfo n’ahandi  cyangwa bagahitamo ababa muri ibyo bihugu bakabaserukira.

Perezida wa ROA,  OLY Sharangabo Alexis yavuze ko iyi gahunda yo kumenyekanisha imikino Olempike yo mu bukonje  yatangijwe hashingiwe ku gitekerezo cy’ishyirahamwe ry’abakinnye imikino Olempike ku rwego rw’Isi “WOA”.

Avuga ko iki gitekerezo cyaje ubwo habaga  iyi mikino “Winter Olympic Games 2022” yabereye i  Beijing mu Bushinwa kuva taliki 04-20 Gashyantare 2022.         Ati : “Hari inama nitabiriye muri Werurwe 2022 ngaragaza ibyo twakoze, tuba bamwe bo mu bihugu 17 by’ Afurika byemerewe kuyikora.”

Perezida wa ROA,  OLY Sharangabo Alexis

Akomeza avuga ko impamvu ibi bihugu by’ Afurika byashyigikiwe muri ubu bukangurambaga ari uko iyi mikino iba mu gihe cy’ubukonje nta gaciro ihabwa cyane kuri uyu mugabane  kandi ko  bishobora guha u Rwanda amahirwe yo kuzayitabira mu gihe abantu baba bamaze kuyisobanukirwa.

Ati: “Hashyizweho gahunda yo gusangiza ubumenyi abatayizi, twatangiriye ku bakinnye imikino Olempike, ariko tuzagera no mu bindi byiciro ndetse dushake n’abaduhagararira mu Banyarwanda batuye hanze mu bihugu bibamo urubura. Iyo ikintu ukimenye wumva ko gishoboka.”

Imikino  Olempike yo mu bukonje “Winter Olympic Games 2022” yabaye ku nshuro ya 24 i Beijing mu Bushinwa  yakinwe muri  siporo 15 zitandukanye, yitabirwa n’abakinnyi 2871. Ibihugu bitanu byo muri Afurika ni byo byitabiriye birimo  Eritrea, Ghana, Maroc na Nigeria  aho buri gihugu cyaserukiwe n’umukinnyi umwe  na ho Madagascar yaserukiwe n’abakinnyi 2.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA