Kuri uyu wa Mbere, tariki ya 22 Ukuboza 2025, Abapolisi bato 1903 barimo abakobwa 359 basoje amasomo mu Ishuri Rikuru rya Polisi rya Gishari riri mu Karere ka Rwamagana binjijwe muri  Polisi y’u Rwanda. 

Ni ibirori byitabiriwe na Minisitiri w’Umutekano w’Imbere mu Gihugu, Dr. Vincent Biruta, abayobozi batandukanye muri Polisi y’u Rwanda n’abandi bayobizi batumiwe mu nzego zitandukanye.

Minisitiri Dr. Vincent Biruta yasabye abapolisi bato 1903 binjijwe muri Polisi y’u Rwanda guhora bashyize imbere umutekano kuko amateka agaragaza ko Igihugu cyawubuze bihagije.

Minisitiri Dr Biruta yagaragaje ko mu myaka 31 ishize Abanyarwanda bufatanye urunana rwatumye Igihugu gitera imbere ndetse kiriyubaka, asaba abapolisi basoje gukomeza gusigasira umutekano w’u Rwanda.

Ati: “Urugendo rw’amateka yacu rwatwigishije ko dukwiye guhora dushyize umutekano imbere kuko twawubuze bihagije.”

Yongeyeho ko ibyagezweho bikeshwa imiyoborere myiza kandi ko gukorera hamwe ari byo bisabwa mu nzira y’iterambere, agaragaza ko Igihugu cyiyemeje gukomeza gusigasira umutekano binyuze mu kugira abapolisi bahagije kandi bakora kinyamwuga, bafite ubumemyi ubushobozi n’imyifatire myiza.

Minisitiri Dr Biruta yashimye abo bapolisi kuba barahisemo neza bakaza kwifatanya na bakuru babo, abibutsa ko bafite inshingano zo guhangana n’ibibazo bicyugatije Abanyarwanda birimo ubusinzi n’ingaruka zabwo, ubujura, gukubita no gukomeresta, gukoresha ibiyibyabwenge, n’ibindi.

Umuyobozi w’Ishuri ry’Amahugurwa rya Gishari CP Robert Niyonshuti, yagarageje ko amezi icyenda abo bapolisi bamaze, bize amasomo abaha ubumenyi, ubushozi n’imyitwarire iboneye bizabafasha mu kazi kabo, abifuriza amahirwe masa mu mirimo bagiyemo.

Yagize ati: “Turabasaba ko aya masomo y’ibanze murangije ibyo mwahigiye muzarushaho kubishyira mu bikorwa.”

Mu basoje amasomo y’amezi icyenda abinjiza muri Polisiy’u Rwanda harimo abasore 1544 n’inkumi 359. Abo bapolisi berekanye amwe mu masomo bigishijwe arimo ayo guhosha imyigaragambyo, kumasha no gutabara,akarasisi, imikino njyarugamba n’ubundi buryo butandukanye bigamije kwirwanaho.

Ubuyobozi bw’Ishuri ry’Amahugurwa rya Gishari bwagaragaje ko mu mezi 12 ashize bahuguye Abapolisi n’abagize Urwego rwa DASSO 8529, aho baguwe mu buryo butandukanye bugamije kubongera ubumenyi.

Mu kwezi kwahariwe ibikorwa bya Polisi y’u Rwanda bishyuriye ubwisungane mu kwivuza abaturage bo mu Murenge wa Gishari 1000, ndetse hanaterwa ibiti birenga ibihumbi 40 mu rwego rwo kubungabunga ibidukikije.

Ba uwa mbere mu kumenya amakuru agezweho!!!