Abayisilamubo mu Rwanda basabwe kwimakaza gukemura ibibazo byo mu ngo binyuze mu biganiro mu rwego rwo kubungabunga imiryango.

Ubuyobozi bw’Umuryango w’Abayisilamu mu Rwanda (RMC) bwabishimangiye kuri uyu wa Gatanu tariki ya 20 Werurwe 2026, mu Isengesho rya Eid al-Fitr risoza igisibo cy’Ukwezi Gutagatifu kwa Ramadhan.

Abagezaho ubutumwa, Umunyamabanga Nshingwabikorwa wa RMC, Sheikh Sibomana Salim yasabye abayisilamu mu gihugu hose kubungabunga imiryango.

Yagize ati: “Umuryango w’abayisilamu mu Rwanda uributsa abashakanye ko bakwiye kubana neza mu mahoro, kwihanganirana, kuzuzanya, kwirinda amakimbirane, umwiryane ndetse n’ubutane bwa hato na hato.

Kuko kutabana mu mahoro bigira ingaruka z’igihe kirekire no gusenyuka k’umuryango.”

Yakomeje agaragaza ko abubatse bakwiye kurushaho kwimakaza umuco w’ibiganiro mu rwego rwo kurinda ko abana bakura nabi.

Ati: “Abashakanye barashishikarizwa kwimakaza umuco w’ibigabiro mu ngo bigamije ubumwe, ubwuzuzanye n’ubusabane mu muryango, ibitumvikanyweho bakihutira kubishakira umuti hakiri kare binyuze mu nzego z’idini zishinzwe gukemura amakimbirane kuko iyo batanye bigira ingaruka mbi ku bana n’Igihugu.”

Mufti w’u Rwanda, Sheikh Mussa Sindayigaya, yasabye abayisilamu basoje igisibo cya Ramadhan gukomeza kurangwa no gukora ibikorwa byiza.

Ati: “Kuba tugisoje ntabwo tugomba guhagarika ibikorwa byiza, ntitugomba guhagarika gusenga, gufasha abatishoboye, ahubwo umunyabwenge agikuramo imbaraga.”

Yakomeje ati: “Ibikorwa byiza ni ibikorwa bikomeza, ntabwo ari ibikorwa bihagararira aho ngaho. Kabone nubwo byaba ari bike ariko bigakorwa mu buryo buhoraho.”

Umuryango w’Abayisilamu mu Rwanda wibukije wibikije abayoboke b’idini ya Isilamu kurushaho kubanira neza abo badahuje ukwemera bimakaza ubumwe bw’Abanyarwanda.

Ba uwa mbere mu kumenya amakuru agezweho!!!