Al Hilal SC yo muri Sudani yatsinze APR FC ibitego 2-0 mu mukino w’ikirarane w’Umunsi wa 15 wa Shampiyona, yongera kwisubiza umwanya wa mbere ku rutonde rw’agateganyo rwa Shampiyona y’u Rwanda.

Uyu mukino wabereye kuri Kigali Pele Stadium, kuri uyu wa Kabiri tariki ya 10 Gashyantare 2026.

APR FC yari yakoze impinduka mu bakinnyi babanza mu kibuga, aho umunyezamu wa Hakizimana Adolphe, yakinnye umukino we wa  mbere w’amarushanwa muri iyi kipe yagezemo muri Nyakanga, avuye muri AS Kigali.

Ku rundi ruhande, Al Hilal SC yitegura umukino izakina FC St-Eloi Lupopo mu CAF Champions League mu mpera z’iki Cyumweru yari yaruhukije bamwe mu bakinnyi bayo bakomeye igenderaho, babanza ku ntebe y’abasimbura.

Ni umukino watangiye wihuta ku mpande zombi, umupira uva ku izamu rimwe ujya ku rindi.

Mu minota wa 20, APR FC yongereye imbaraga isatira izamu rya Al Hilal SC arimo umupira Bugingo Hakim yahinduye imbere y’izamu, ufatwa na Hakim Kwianuka awuteye ujya hanze.

Ku munota wa 24, Al Hila SC yafunguye amazamu ku gitego cyatsinzwe na Madicke Kane ku mupira uteretse yateye, umunyezamu Hakimana Adolphe ananirwa kuwugarura ujya mu rushundura.

Mu minota 35, APR FC yagerageje gushaka igitego cyo kwishyura harimo umupira Ouattara yahinduye mu rubuga rw’amahina, William Togui awukinnye n’umutwe ujya hejuru.

Igice cya mbere cyarangiye Al Hilal SC yatsinze APR FC igitego 1-0.

Al Hilal SC yatangiranye impinduka mu gice cya kabiri, Ernest Nsita Luzolo na Girumugisha Jean Claude basimbura Walieldin Daiyeen na Adama Coulibali.

Muri iki gice, APR FC yakomeje gusatira ishaka igitego cyo kwishyura harimo uburyo bukomeye bwahushijwe na Ruboneka Jean Bosco ari wenyine imbere y’izamu ateye ishoti rijya hejuru.

Mu minota 65, umukino wagabanyije umuvuduko, amakipe yombi akinira cyane mu kibuga bituma n’uburyo two kurema igitego buba buke cyane.

Ku munota wa 71, umutoza wa APR FC yakoze impinduka ebyiri Mamadou Sy na Memel Dao basimbura Djibril Ouattara na Ruboneka Bosco.

Ku munota wa 78, Emmanuel Flomo yatsindiye Al Hilal SC igitego cya kabiri ku mupira mwiza wahinduwe na Jean Claude Birumugisha, awutera mu izamu ukurwamo nabi n’umunyezamu Hakizimana Adolphe, ahita awusubizamo.

Umukino warangiye Al Hilal SC yatsinze APR FC ibitego 2-0, ifata umwanya wa mbere n’amanota 38 mu mikino 16 imaze gukina mu gihe APR FC yagumye ku mwanya wa Kabiri n’amanota 37.

Iyi kipe yo muri Sudani izasubira mu kibuga ku wa Gatandatu yakirira FC St-Eloi Lupopo yo muri Repubulika Iharanira Demokarasi ya Congo mu mukino wo mu itsinda rya gatatu rya CAF Champions League, uzabera Stade Amahoro guhera saa cyenda.

Muri uyu mukino iyi Kipe izaba isabwa gutsinda cyangwa kunganya, ikabona itike yo gukina imikino ya 1/4 cy’irangiza.

Abakinnyi babanje mu kibuga ku mpande zombi

APR FC:

Adolphe Hakizimana, Gilbert Byiringiro, Clement Niyigena, Yunussu Nshimiyimana, Hakim Bugingo, Ronald Ssekiganda, Dauda Yussif Seidu, Hakim Kiwanuka, Ruboneka Jean Bosco, Djibril Ouattara na William Togui.

Al Hilal SC:

Mohamed Mustafa, Yaser Awad Boshara, Ousmane Diouf, Aprocious Petrus, Kamaradini Mamudu, El Hadji Kane, Walieldin Khidir, Kindness Cole, Adama Coulibaly, Emmanuel Flomo na Sunday Adetunji.

Ba uwa mbere mu kumenya amakuru agezweho!!!