Ikipe ya Al Hilal SC yo muri Sudani yatsinze Mamelodi Sundowns yo muri Afurika y’Epfo ibitego 2-1, yiyongerera amahirwe yo kurenga imikino y’amatsinda ku makipe yabaye aya mbere iwayo muri CAF Champions League.

Uyu mukino w’Umunsi wa kane wo mu itsinda rya gatatu wabereye kuri Stade Amahoro mu ijoro ryo kuri uyu wa Gatanu, tariki ya 30 Mutarama 2026.

Amakipe yombi yaherukaga guhurira mu mukino w’umunsi wa gatatu wabereye i Pretoria mu cyumweru gishize warangiye banganyije ibitego 2-2.

Ni umukino watangiye ushyushye cyane ishyaka ari ryose ku mpande zombi, ariko Mamelodi Sundowns ikiharira cyane umupira hagati mu kibuga.

Ku munota wa 20, Al Hilal SC yahushije uburyo bw’igitego imbere y’izamu ku mupira watewe nabi n’umunyezamu Denis Onyango, ufatwa na Salaheldin Adil uca ku ruhande rw’izamu.

Iyi kipe yo muri Sudani yakomeje gukina neza binyuze mu bakinnyi bayo bakina imbere basatira barimo Jean Claude Girumugisha na Adam Coulibali bari bagoye abakinnyi b’inyuma ba Mamelodi Sundowns.

Ku munota wa 40, Jean Claude Girumugisha yahinduye umupira mwiza imbere y’izamu, usanga kapiteni Mohammed Abdelrahman wari uhagaze neza ananirwa gukozaho ikirenge umupira ujya hanze.

 Mbere y’uko igice cya mbere kirangira umusifuzi wa kane yongeyeho iminota itatu y’inyongera.

Ku munota wa 45+2, umunyezamu wa Mamelodi Sundowns, Denis Onyango yateze Adam Coulibali mu rubuga rw’amahina umusifuzi yemeza ko ari penaliti ya Al Hilal SC.

Iyi penaliti yinjijwe neza na Mohammed Abdelrahman bituma Al Hilal SC isoza igice cya mbere iyoboye n’igitego 1-0.

Mamelodi Sundowns yatangiranye impinduka mu gice cya kabiri Arthur de Oliveira Sales asimbura Miguel Silva Reisinho.

Muri iki gice Al Hilal SC yakomerejeho, bidatinze ku munota wa 49, Jean Claude Girumugisha yatsinze igitego cya kabiri ku ishoti rikomeye yatereye hanze y’uburuga rw’amahina, umupira uruhukira mu rushundura.

Al Hilal SC yakomeje kurusha cyane Mamelodi Sundowns yagowe no kwibona mu mukino ndore ko no guhererekanya umupira inshuro enye byari byanze.

Ku munota wa 61, rutahizamu Arthur de Oliveira Sales yatsindiye Mamelodi Sundowns igitego cya mbere cyo kwishyura ku mupira wahinduwe imbere y’izamu na Peter Shalulile ahita awushyira mu izamu.

Iyi kipe yo muri Afurika y’Epfo yongereye imbaraga ikomeza gusatira ishaka igitego cya kabiri cyo kwishyura ariko ubwugarizi bwa Al Hilal SC bukomeza guhagara neza.

Ku munota wa 76, Mamelodi Sundowns yahushije igitego cyabanzwe ku mupira wahinduwe na Arthu Sales, usanga Peter Shalulile awuteye ukurwamo neza n’umunyezamu Farid Ouedraogo.

Iminota 10 ya nyuma, Mamelodi Sundowns yagerageje gushaka ishaka igitego cya kabiri ariko  ubwugarizi n’umunyezamu wa Al-Hilal SC bihagararaho.

Umukino warangiye Al Hilal SC yatsinze Mamelodi Sundowns ibitego 2-1, ihita iyobora Itsinda C n’amanota umunani, iyo muri Afurika y’Epfo igumana atanu ku mwanya wa kabiri, Saint Eloi Lupopo iri ku mwanya wa gatatu n’amanota ane mu mikino itatu mu gihe MC Alger ari iya kane n’inota rimwe.

Undi mukino wo muri iri tsinda, uzahuza MC Alger na FC Saint-Éloi Lupopo, ku Cyumweru, tariki ya 1 Gashyantare 2026.

Ba uwa mbere mu kumenya amakuru agezweho!!!