Umutoza w’Ikipe y’Igihugu y’Amagare David Louvet yatangaje urutonde rw’abakinnyi 23 barimo abahungu n’abakobwa mu byiciro byose, bazitabira Shampiyona Nyafurika izabera muri Kenya tariki 19-23 Ugushyingo 2025.

Mu cyiciro cy’abagabo bakuru harimo Mugisha Moïse (Benediction Club), Masengesho Vainqueur (Benediction Club), Nsengiyumva Shemu (Java-InovoTec), Manizabayo Eric (Java-InovoTec), Muhoza Eric (Team Amani), Byukusenge Patrick (Java-InovoTec) na Ngendahayo Jérémie (May Stars) ni mu gihe mu bagore harimo Nirere Xaverine (Team Amani) na Ingabire Diane (Canyon/SRAM Sondacrypto Generation).

Mu bagabo batarengeje imyaka 23 hitabajwe Samuel Niyonkuru na Etienne Tuyizere naho mu bagore Jazilla Mwamikazi, Martha Ntakirutimana na Claudette Nyirarukundo.

Mu ngimbi hahamagawe Ntirenganya Moïse (Les Amis Sportifs), Nkurikiyinka Jackson (Nyabihu Cycling Club), Byusa Pacifique (Les Amis Sportifs) na Ishimwe Brian (Ndabaga Cycling Team) ni mu gihe mu bangavu u Rwanda ruzahagarirwa na Yvonne Masengesho.

Ku nshuro ya mbere, u Rwanda ruzahagararirwa kandi n’abakinnyi batarengeje imyaka 17 aho abahungu bazitabira ari Shema Emmanuel na Gisubizo Issa bakinira Les Amis Sportifs mu gihe abakobwa ari Iransetsa Amina wa LWD Cycling Team na Akimana Donatha wa Ngarama Women Cycling Team.

Biteganyijwe ko aba bakinnyi bazahaguruka mu Rwanda berekeza i Mombasa muri Kenya ku wa Kabiri, tariki ya 18 Ugushyingo 2025.

Mu 2024, ubwo iri rushanwa ryari ryabereye mu Mujyi wa Eldoret wo muri icyo gihugu, u Rwanda rwari rwahagarariwe n’abakinnyi 20 barimo abagabo umunani, bane batarengeje imyaka 23 na bane batarengeje imyaka 19. Hari kandi n’abakobwa bane bakinnye mu cyiciro cy’abakuru n’abatarengeje imyaka 23.

Mu bihugu 22 byitabiriye, Team Rwanda yasoreje ku mwanya wa kane mu midali, inyuma ya Eritrea, Afurika y’Epfo na Uganda. Yegukanye imidali ine irimo umwe wa Zahabu, umwe wa Feza n’ibiri y’Umuringa.

Ba uwa mbere mu kumenya amakuru agezweho!!!