Umunya-Eritrea Biniam Girmay mu bagabo na Kimberley Le Court wo mu Birwa bya Maurice mu bagore, begukanye ibihembo by’abahize abandi mu mukino w’amagare muri Afurika mu mwaka wa 2025 (Africa Cycling Excellence Awards (ACEA).

Ibi birori byo guhemba abitwaye neza byabereye muri Zaria Court ku mugoroba wo kuri uyu wa Gatandatu, tariki ya 29 Ugushyingo 2025 witabirwa n’Umunyamabanga wa Leta muri Minisiteri ya Siporo, Rwego Ngarambe; Perezida wa CAC, Yao Yao Allah-Kouamé n’intumwa za UCI.

Ibi bihembo byatangwaga ku nshuro ya mbere byateguwe n’Impuzamashyirahamwe y’Umukino w’Amagare muri Afurika (CAC).

Mu bagabo, Umunya-Eritrea Biniam Girmay yabaye umukinnyi w’umwaka mu bagabo bakina umukino w’amagare muri Afurika.

Yahigitse bagenzi be bakomoka mu gihugu kimwe ari bo Henok Mulubrhan na Milkias Maekele.

Mu mwaka ushize wa 2024, Biniam Girmay yabaye umukinnyi wa mbere wo muri Afurika wegukanye uduce dutatu muri Tour de France.

Mu bagore, umukinnyi mwiza w’umwaka yabaye Kimberley Le Court wo mu Birwa bya Maurice. Yahigitse Abanya-Ethiopia Kahsay Tsige Kiros na Selam Amha Gerefiel.

Mu bihembo byatanzwe, Umurundi Odette Nsengiyumva yatowe nk’Umukinnyi mwiza mu Bagore mu Karere ka Afurika y’Iburasirazuba ni mu gihe mu bagabo yabaye Charles Kagimu wo muri Uganda.

Umukinnyi w’umwaka utarabigize umwuga yabaye Paul Daumont wo muri Burkina Faso.

Ikipe y’Igihugu y’umwaka yabaye Eritrea yahigitse (Team Rwanda) n’Ibirwa bya Maurice.

Mu Banyarwanda bitwaye neza, Xaverine Nirere yabaye umukinnyi w’umwaka mu bagore ni mu gihe mu bagabo cyegukanywe na Masengesho Vainqueur.

Perezida w’Impuzamashyirahamwe y’Umukino w’Amagare muri Afurika (CAC), Dr. Yao Allah-Kouamé, yashimangiye ko umwaka wa 2025 wabaye udasanzwe kuri Afurika kuko u Rwanda rwawakiriyemo Shampiyona y’Isi y’Amagare yo gusiganwa mu muhanda.

Ati: “Byari ibirori bihambaye byashimangiye ibyo Afurika ishoboye iyo umuyobozi ufite intego ashyize ku isonga abaturage be. Ndashimira Perezida Kagame kandi mubwira ko yatumye twishimira kuba Abanyafurika.

Umunyamabanga wa Leta muri Minisiteri ya Siporo, Rwego Ngarambe, yavuze ko uyu munsi ari ‘uwa Afurika mu mukino w’amagare’.

Ati: “Turi hano kubashyigikira, dukeneye ko mutsinda muri Tour de France n’andi marushanwa kandi tuzi ko mufite ubwo bushobozi. Turi ibihugu 54, buri gihugu gifite ubushobozi bwo gutegura amarushanwa atandukanye. Tubifate nk’amahirwe yo kuzamura umukino w’amagare no guteza imbere ishoramari rishingiye kuri siporo.

Ku nshuro ya kabiri, ibi bihembo bizongera kubera mu Rwanda mu Ugushyingo 2026.

Ba uwa mbere mu kumenya amakuru agezweho!!!