Intore mu ikoranabuhanga za RISA mu Ntara y’Amajyaruguru zatanze telefone zigera muri 285 ku baturage b’abafatanyabikorwa ba VUP bo mu Turere twose tugize iyo Ntara.

Izo ntore zatanze telefone ngendanwa ku baturage 57 muri buri Karere mu tugize Intara y’Amajyaruguru, zose hamwe zifite agaciro k’amafaranga y’u Rwanda 3 360 000.

Ku bufatanye na buri Karere bafashije guhitamo abafatanyabikorwa bo muri VUP batishoboye kurusha abandi.

Iki gikorwa cy’indashyikirwa cyateguwe n’Intore mu Ikoranabuhanga (Digital ambassadors) zikorera mu Ntara y’Amajyaruguru, hagamijwe gushyigikira imibereho myiza y’abaturage no gushyira mu bikorwa indangagaciro zo kwigira n’ubumwe.

Ni igikorwa cyabereye mu Karere ka Musanze, izo telefone zatanzwe tariki 01 Gashyantare 2026 ku cyigo cy’urubyiruko kiri mu Murenge wa Muhoza, ubwo hizihizwaga Umunsi w’Intwari z’Igihugu.

Amafaranga yo kugura izo telefone yatanzwe n’Intore mu ikoranabuhanga   zikorera mu Ntara y’Amajyaruguru.

Telefone zashyikirijwe abaturage na Guverineri w’Intara y’Amajyaruguru Mugabowagahunde Maurce, n’intore mu ikoranabuhanga zikorera mu Karere ka Musanze n’umuyobozi w’intore mu ikoranabuhanga w’Intara y’Amajyaruguru Irambona Ezechias.

Guverineri w’Intara y’Amajyaruguru Mugabowagahunde yashimiye byimazeyo Uruhare Intore mu ikoranabuhanga bagenda bagaragaza mu kwigisha abaturage bakagira ubumenyi bw’ibanze mu ikoranabuhanga.

Yagize ati: “Intore mu ikoranabuhanga, turabashimira uburyo mwigisha abaturage bakagira ubumenyi ku ikoranabuhanga bikabafasha kugera kuri serivisi z’ikoranabuhanga biboroheye, harimo kwisabira serivisi zitandukanye za Leta babyikoreye. Ni umusingi ukomeye mu kwihutisha iterambere ry’umuturage

Yakomeje abashimira Intore mu ikoranabuhanga kugikorwa cyiza bakoze cyo kwishakamo ubushobozi bakagurira bamwe mu baturage bo muri VUP telefone aho wasangana abenshi ntazo bafite.

Abaturage bo muri VUP bahawe telefone bavuze ko zigiye kubafasha mu buzima bwabo bwa buri munsi kuko bagorwaga cyane no kubona amafaranga y’inkunga bahabwa na Leta kuko baburaga uko bayabikuza bakoresheje telefone bikabasaba kujya ku Mirenge Aacco ibegereye.

Umwe muri bo yagize ati: “Twishimiye ko izi telefone duhawe zitworohereje ingendo twakoraga tujya kuri SAcco Umurenge. Ubu tuzajya tubona amafaranga twifashishije izi telefone.”

Bavuze ko nyuma yo guhabwa izo telefone ngendanwa bazajya bayabikuza batavuye aho batuye ndetse ko teleone bahawe zizakomeza kubafasha mu buzima bwabo bwa buri munsi mu zindi serivisi zijyanye n’ikoranabuhanga.

Ubusanzwe Intore mu Ikoranabuhanga (Digital ambassadors) zigisha abantu bose ubumenyi bw’ibanze mu ikoranabuhanga harimo nko kwisabira serivisi za Leta n’iza Byikorere cyane cyane iziboneka ku rubuga rw’Irembo, zikorera Ikigo cy’Igihugu gishinzwe Isakazabumenyi mu Itumanaho (RISA).

Ba uwa mbere mu kumenya amakuru agezweho!!!