Amashuri yo mu byaro agiye gukwizwamo internet ikoresha ingufu z’imirasire y’izuba
Ikoranabuhanga

Amashuri yo mu byaro agiye gukwizwamo internet ikoresha ingufu z’imirasire y’izuba

NTAWITONDA JEAN CLAUDE

December 12, 2023

Guverinoma y’u Rwanda, ibinyujije muri Minisiteri y’Ikoranabuhanga no guhanga Ibishya (MINICT) na Minisiteri y’Uburezi  (MINEDUC), yatangiye ubufatanye n’Ikigo Ignite Power yo gukwirakwiza internet ikoresha ingufu z’imirasire y’izuba mu mashuri yo mu bice by’icyaro bitandukanye mu gihugu.

Ignite Power ni ikigo Mpuzamahanga gitanga ibisubizo bishingiye ku ngufu zituruka ku mirasire y’izuba mu miryango ikennye kurusha iyindi muri Afurika yo munsi y’Ubutayu bwa Sahara,  giheruka gutsindira igihembo mpuzamahanga cyiswe Zayed Award cy’uyu mwaka wa 2023.

Ubufatanye bwatangiye hagati ya Leta y’u Rwanda n’icyo kigo bugamije kugeza internet ku bigo by’amashuri biri mu byaro bya kure aho bigoye kugeza umuriro w’amashanyarazi afatiye ku muyoboro mugari.

Minisitiri w’Ikoranabuhanga no guhanga Ibishya Ingabire Musoni Paula, yagize ati: “Ubu bufatanye busobanuye ukwiyemeza kwacu ko guharanira ko buri muturage, by’umwihariko abanyeshuri, abona amahirwe angana n’ay’abandi muri iyi Si ikomeje gutera imbere mu ikoranabuhanga rigezweho.”

Iyi gahunda yitezweho gufasha amashuri yo mu Rwanda kubona ibikoresho bigezweho by’ikoranabuhanga birimo anteni za LinX zikurura internet itangwa n’ibyogajuru, bigatuma ibigo by’amashuri bibona internet inyaruka ku giciro gito aho byaba biherereye hose.  

Nubwo hari intambwe ikomeye imaze guterwa mu rwego rw’uburezi mu Rwanda, Leta y’u Rwanda ivuga ko hakiri amashuri yo mu byaro bya kure ataragerwaho n’umuriro w’amashanyarazi ndetse n’ibikorwa remezo bya internet, bityo abanyeshuri bakagorwa no kugera ku ikoranabuhanga ribafasha kubyaza umusaruro amahirwe ya internet.

Ikigo Ignite Power cyahawe igihembo cyiswe Zayed Award

Ubwo bufatanye bwitezweho kuba igisubizo kirambye mu kuziba icyuho cyarangwaga mu rugamba rwo guharanira kugeza uburezi bungana kuri bose binyuze mu kubaha ibikorwa remezo by’ibanze birimo n’ihuzanzira rya internet.

Minisitiri Ingabire yakomeje agira ati: “Tunejejwe no gutangiza ubu bufatanye n’ikigo cy’abikorera cy’intangarugero nka Ignite Power. Kugeza internet kuri bose mu burezi ni ingenzi cyane kugira ngo tugere ku ntego yo kubaka sosiyete ishingiye ku bumenyi.”

Ignite Power itangiye ubwo bufatanye mu gihe yari imaze no kwigaragaza mu Rwanda nk’ikigo gishoboye gukwirakwiza ingufu kuko imaze kuzigeza ku baturage barenga miliyoni mu bice bitandukanye by’Igihugu aho bamaze kugezwaho ibikoresho by’imirasire bigezweho kandi bikora mu buryo burambye.

Ikoranabuhanga rya LinX solution, rigiye kugezwa mu mashuri rikoresha imirasire y’izuba ku kigero cya 100%, bikaba ari byo bizoroshya kuba zashyirwa mu mashuri ataragezwamo amashanyarazi asanzwe, bikaba bijyanye na gahunda y’Igihugu yo kugera ku Ntego z’Iterambere rirambye z’Umuryango w’Abibumbye (UNSDGs).

Yariv Cohen, Umuyobozi Mukuru wa Ignite Power, yashimangiye ko kugeza ibikorwa remezo by’ibanze ku bantu bose ari ingenzi cyane, ati: “Ihuzanzira rya internet ryahindutse igikorwa remezo shingiro n’uburenganzira bwa muntu mu Isi ya none. Tunejejwe gukorana na Guverinoma y’u Rwanda mu guharurira inzira ahazaza hatagira n’umwe hasigaza inyuma, aho u Rwanda ruyoboye impinduka no mu bindi bihugu by’Afurika.”

Cohen yakomeje agira ati: “Ibisubizo byacu byifashisha ingufu z’imirasire y’izuba 100% byihutisha ikwizwa ry’ikoranabuhanga kandi bikanashimangira ukwiyemeza kwacu mu gushyigikira ibiramba. Iyi gahunda irashyira ibuye ry’ifatizo ku iterambere ridaheza kandi rirambye mu Rwanda no hanze.”

TANGA IGITECYEREZO

  • UZABUMWANA JEAN PAUL
    December 12, 2023 at 5:30 pm Musubize

    Iyi hahunda ni nziza pe! Ahubwo izashyirwe mu mashuri yose hatitawe kukuba hari amashanyarazi cyangwa se ngo ntayo …bizafasha peu✅🤍🤍🤍🤍

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA