Ubuyobozi bw’Ikigega Gishinzwe guteza imbere imishinga mito n’iciriritse BDF, bwatangije ubukangurambaga buzasiga hatewe inkunga imishinga nibura 1000, ikazahabwa inguzanyo ya miliyari 2.5 z’amafaranga y’u Rwanda binyuze mu bigo by’imari.

Umuyobozi Mukuru wa BDF, Vincent Munyeshyaka, yabigarutseho kuri uyu wa Gatanu tariki ya 01 Ugushyingo 2024, mu kiganiro yahaye abanyamakuru.

Ubuyobozi bwa BDF bugaragaza ko ubukangurambaga bw’amezi atatu bugamije ahanini kumenyekanisha iki kigega Gishinzwe guteza imbere Imishinga mito n’iciriritse.

Ni ubukangurambaga bwatangijwe kuri uyu wa 01 Ugushyingo bukazarangira mu kwezi kwa Mutarama 2025. Buzakorwa mu gihugu hose by’umwihariko mu Turere dukora ku muhanda wa Kivu Belt.

Munyeshyaka yagize ati: “Ubukangurambaga bugamije kumenyekanisha BDF na serivisi itanga, aho buzasiga nibura imishinga 1000 itewe inkunga ikazaba ifite agaciro k’amafaranga angana na miliyari 2.5.

Mu mishanga y’ubuhinzi twizera ko tuzabona imishinga 20 izaterwa inkunga y’amafaranga y’u Rwanda 200 000 000 binyuze mu bigo by’imari.”

BDF yizeye ko 1,500,000,000 Frw zizishyurwa binyuze mu mushinga wo guteza imbere ubuhinzi bugamije ubucuruzi no kugabanya ibibubangamira (CDAT) mu gihe cy’amezi atatu.

Mu Mirenge SACCO hazanyuzwamo inkunga ya 600,000,000 Frw.

Umuyobozi Mukuru wungirije wa BDF, Semigabo Rosalie, yavuze ko buri munyarwanda wese yemerewe gusaba inkunga muri BDF.

Akomeza agira ati: “By’umwihariko abemerewe inkunga ya BDF ni urubyiruko, abagore, abantu bafite ubumuga, abatishoboye bacitse ku icumu rya Jenoside yakorewe Abatutsi, abakozi ba Leta bagabanyijwe na MIFOTRA, n’ingabo zavuye ku rugerero ( demob).”

Mu ntego za Guverinoma y’u Rwanda mu myaka itanu iri imbere harimo kugera ku gipimo cy’izamuka ry’ubukungu cya 9,3% buri mwaka, bikazagerwaho mu gihe ubuhinzi bwakwiyongera nibura kuri 6%, urw’inganda rukazamuka ku 10%, serivisi zikazamuka ku 10%.

Guverinoma y’u Rwanda iteganya ko muri NST2, ibikorerwa mu Rwanda biziyongera kuri 13% buri mwaka, ishoramari ry’abikorera rikava kuri miliyari 2,2 z’amadolari mu 2024, rikagera kuri miliyari 4,6% mu 2029, ikigero cy’ubwizigame kikazava kuri 12,4% by’umusaruro mbumbe w’igihugu kikagera kuri 25%.