Ikipe y’Igihugu ya Angola yegukanye irushanwa nyafurika rizwi nka AfroBasket ryabereye iwabo ihigitse Mali biba inshuro ya 12 mu mateka iyi kipe itwara iki gikombe.

Angola yegukanye iki gikombe nyuma yo gutsinda Mali amanota 70 kuri 43. Ni mu mukino wabereye muri Pavilhao Multiusos de Luanda ku mugoroba wo ku Cyumweru tariki ya 24 Kanama 2025.

Ikipe ya Angola yashyikirijwe iki gikombe cyahatanirwaga ku nshuro ya 31 na Perezida w’iki gihugu Joao Lourenco. 

Angola yaherukaga igikombe cya Afurika mu 2013, yihariye uduce twose tw’umukino aho yatsinze agace ka mbere n’amanota 14-10, aka kabiri yagatsinze amanota 18-10, aka gatatu yatsinze amanota 19-11 mu gihe agace ka nyuma yatsinze amanota 19-12. 

Angola yasoje imikino y’igikombe cya Afurika nta mukino n’umwe itsinzwe muri itandatu yakinnnye.

Muri uyu mukino, Umunya Angola Childe Dundao ni we witwaye neza aho yatsinze amanota menshi 16 mu gihe Siriman Kanoute wa Mali yatsinze 14.

Angola yaherukaga igikombe cya Afurika 2013 cyabereye mu Côte d’Ivoire itsinze Misiri amanota 57-40.  

Muri rusange, Angola imaze kwegukana igikombe cya Afurika inshuro 12. 

Umukino wa nyuma wa Afro Basket wabaye nyuma y’uwo Sénégal yahuyemo na Cameroon, ikanawutsinda ku manota 98 kuri 72, biyihesha kuba ikipe ya gatatu. 

Senegal yisubije umwanya wa gatatu ku nshuro ya gatatu yikurikiranya (2017, 2021 na 2025). 

Mu bakinnyi bahembwe harimo Childe Dundao (Angola) watowe nk’umukinnyi mwiza w’irushanwa (MVP); Brancou Badio (Sénégal) yahawe igihembo cy’uwatsinze amanota menshi (139) aba n’umukinnyi uwarushije abandi gutsinda amanota atatu aho yayatsinze inshuro 25. 

Alioun Diarra wa Mali yahawe igihembo cy’uwarushije abandi gufata imipira itageze mu nkangara (Best Rebounder) aho yafashe imipira 60.

Muri iri rushanwa hanatowe ikipe nziza igizwe na Bruno Fernando

(Angola), Aliou Diarra (Mali), Mahamane Coulibaly (Mali ), Brancou Badio (Sénégal) na Childe Dundao (Angola).