APR BBC ikomeje kwitegura imikino ya Basketball Africa League (BAL 2026), yongeye Umunyamerika Quinn Cook n’Umunya-Sudani y’Epfo, Madut Akec mu bakinnyi izifashisha.

Quinn Cook nk’Umu-Point Guard ni umwe mu bitezwe cyane kuko yanyuze mu makipe yo muri Leta Zunze Ubumwe za Amerika Golden State Warriors yatwayemo igikombe cya Shampiyona mu 2018 na the LA Lakers yatwayemo igikombe mu 2020. Yanyuze kandi muri Dallas Mavericks, New Orleans Pelicans na Cleveland Cavaliers.

Iyi kipe y’Ingabo z’Igihugu yongeyemo kandi Madut Akec w’imyaka 27 wakiniye Guelph Nighthawks yo muri Canada, Etha Engomis yo muri Cyprus ndetse yakiniye AS Douanes yo Senegal muri BAL 2024.

Aba bakinnyi biyongereye k’Umunyamerika Leonard Craig Randall n’Umunya-Sudani y’Epfo, Mangok Mathiang.

Hari Kandi Teafale Lenard w’imyaka 24 wakiniraga MBB BBC mu marushanwa ya BAL 2025 ndetse ni umwe mu bagaragaje urwego rwiza ubwo bakinaga na APR BBC mu Itsinda rya Nile Conference ryabereye muri BK Arena.

Ni ku nshuro ya gatatu yikurikiranya APR BBC igiye kwitabira iri rushanwa rihuza amakipe yabaye aya mbere iwayo rigiye gukinwa ku nshuro ya 6.

Ikipe y’Ingabo iri mu gace ka Kalahari Conference kazakinira mu Mujyi wa Pretoria kuva tariki ya 27 Werurwe kugeza tariki ya 5 Mata 2026, aho iri kumwe n’amakipe arimo Al Ahly Tripoli yo muri Libya, Dar City yo muri Tanzania, Nairobi City Thunder yo muri Kenya na Petro de Luanda yo muri Angola.

Irushanwa riheruka ryegukanywe na Al Ahly Tripoli yo muri Libya itsinze Petro de Luanda yo muri Angola amanota 88-67.

Ba uwa mbere mu kumenya amakuru agezweho!!!