APR FC yatsinze Amagaju FC igitego 1-0 mu mukino wabimburiye indi y’Umunsi wa 25 wa Shampiyona, yongera kwisubiza umwanya wa mbere ku rutonde rw’agateganyo rwa Shampiyona y’u Rwanda.

Uyu mukino wabereye kuri Kigali Pele Stadium, ku mugoroba wo kuri uyu wa Gatanu, tariki ya 20 Werurwe 2026, witabirwa n’abafana bake cyane.

Ni umukino watangiye ugenda gahoro, amakipe yombi akinira mu kibuga hagati, nta n’imwe irema uburyo bwo gushaka igitego.

Ku munota wa 10, Amagaju FC yagerageje uburyo bwa mbere bwo gutsinda igitego ku mupira Dusabe Jean Claude yateye uca hafi y’izamu gato.

Ku munota wa 15’ APR FC yafunguye amazamu ku rutahizamu Djibril Ouattara yatsinze igitego ku ishoti yateye mu izamu, Daouda Yussif akaba ari we wari uwumuhereje.

Mu minota 35, Amagaju FC yiminjiriyemo agafu asatira izamu rya APR FC ishaka igitego cyo kwishyura harimo umupira Rwema Amza yahinduye mu rubuga rw’amahina, Nshimiyimana Yunusu awushyira muri koruneri,itagize icyo itanga.

Mu mpera z’igice cya mbere, APR FC yashoboraga gutsinda igitego cya kabiri ku mupira Djibril Ouattara arebana n’izamu uca ku ruhande.

Igice cya mbere cyarangiye APR FC itsinze Amagaju FC igitego 1-0.

Amagaju FC yakomeje gusatira mu igice cya kabiri ishaka igitego cyo kwishyura harimo uburyo Ndayishimiye Edouard yahushije ari hafi y’uburuga rw’amahina, awuteye ujya hejuru y’izamu.

Mu minota 65’ iyi kipe y’i Nyamagabe yakomeje gukina neza abarimo Iradukunda Desire babona uburyo bwo gutsinda igitego ariko bakagorwa no ku bubyaza umusaruro.

Ku munota wa 75’ Ndayishimiye Edouard yabonye amahirwe yo gutsinda igitego cyo kwishyura ku ishoti rikomeye yateye mu izamu, ku bw’amahirwe make ye, umunyezamu Hakizimana Adolphe arikuramo.

Iminota 10 ya nyuma, yaranzwe no gusatira kwa APR FC yashakaga igitego cy’umutekano ariko abakinnyi bayo barimo Ouattara na William Togu bakagorwa no kubyaza umusaruro uburyo babonaga.

Umukino warangiye APR FC itsinze Amagaju FC ibitego 1-0, ifata umwanya wa mbere n’amanota 49, ikaba irusha inota rimwe Al Merrikh ndetse n’amanota ane Al Hilal SC.

Amagaju FC yo yagumye ku mwanya wa 17 n’amanota 21.

Ba uwa mbere mu kumenya amakuru agezweho!!!