APR FC yatsinze Muhazi United igitego 1-0 mu mukino w’Umunsi wa 10 wa Shampiyona, ikomeza kuzamuka ku rutonde rw’agateganyo rwa shampiyona.

Uyu mukino wabaye ku mugoroba wo kuri uyu wa Gatandatu tariki 23 Ugushyingo 2024, kuri Kigali Pele stadium.

APR FC yatangiye umukino isatira cyane izamu rya Muhazi United harimo uburyo bwabonywe na Niyibizi Ramadhan ku mupira watanzwe nabi na Dikoume Yvan wa Muhazi United, ashatse gushyira mu izamu umupira ukurwano neza n’umunyezamu Amani Twagirayezu.

Ku munota wa 8, APR FC yahushije igitego kidahushwa ku mupira mwiza watanzwe na Byiringiro Gilbert mu rubuga rw’amahina, usanga Mbaoma wari wenyine asigaranye n’umunyezamu, ariko awushyize mu izamu Amani awukuramo neza.

Ku munota wa 10, Muhazi United yabonye uburyo imbere y’izamu rya APR FC ku mupira Mbanza Caleb yatanze, usanga Sackey mu rubuga rw’amahina, wawuteye n’umutwe ufatwa neza na Pavelh Ndzila.

Ku munota wa 28, APR FC yahushije igitego cyabazwe ku mupira mwiza Niyomugabo Claude yahaye Victor Mbaoma wawushyize mu izamu ariko ugarurwa n’umutambiko wo hejuru, ashatse gusongamo umupira ujya hanze.

APR FC yasatiraga cyane yongeye kugerageza uburyo ku munota wa 30 ku mupira Dushimimana Olivier Muzungu yashyize mu rubuga rw’amahina, Victor Mbaoma awuteye n’umutwe wifatirwa n’umuyezamu Amani Twagirayezu.

Ku munota wa 36, APR FC yateye Coup Franc ku ikosa ryari rikorewe Lamine Bah, Niyibizi Ramadhan yateye iyi Coup Franc neza, umunyezamu Amani yongera gukuramo umupira awushyira muri koruneri.

Ku munota wa 40, APR FC yabonye igitego cya mbere cyatsinzwe na Mugiraneza Frodouard ku mupira yatereye inyuma y’urubuga rw’amahina uruhukira mu nshundura. nyuma yo gucenga abakinnyi babiri ba Muhazi.

Ku munota wa 41, APR FC yakoze impinduka havamo Victor Mbaoma Chukuemeka wari wavunitse asimburwa na Arsene Tuyisenge

Ku munota wa 43, Muhazi United yabonye amahirwe yo kwishyura igitego ku mupira Babuwa Samson yateye atunguye umunyezamu Ndzila, gusa uyu ashobora kuwukuramo awushyira muri koruneri yatewe,ubwugarizi bwa APR FC bukiza izamu.

Igice cya mbere cyarangiye APR FC iyoboye umukino n’igitego 1-0 cyatsinzwe na Mugiraneza Frodouard.

Mu gice cya kabiri, APR FC yakomeje gusatira ishaka igitego cya kabiri harimo uburyo bwabonetse ku munota wa 50’ ku mupira wazamukanywe na Mugisha Gilbert Mugisha Gilbert, awushyira mu rubuga rw’amahina, Lamine Bah awuteye ubwugarizi buritambika, buwukuramo neza bukiza izamu.

Ku munota wa 62, APR FC yabonye uburyo bwo gutsinda igitego cya kabiri ku mupira Mugisha Gilbert yahaye Lamine Bah wari mu rubuga rw’amahina, asiga Karenzi Joseph wari wamufashe, ateye umupira ujya hanze.

Ku munota wa 69, Muhazi United uburyo bwo gutsinda igitego cyo kwishyura ku mupira muremure wari uvuye ku munyezamu, usanga Babuwa Samson ari wenyine hafi y’izamu azamukana umupira ku ruhande rw’ibumoso, gusa ashatse kuwugarura mu rubuga rw’amahina Niyigena Clement akiza izamu rye.

Ku munota wa 78, APR FC yahushije igitego cya kabiri  ku mupira Mugisha Gilbert yahereje  Lamine Bah wari mu rubuga rw’amahina, uyu munyamali awumusubiza neza, gusa Mugisha ateye mu izamu umupira ujya hanze.

Umukino warangiye APR FC itsinze Muhazi United igitego 1-0 ikomeza kuzamuka ku rutonde rwa shampiyona.

APR FC yahise ifata umwanya wa cyenda n’amanota 11 mu gihe Muhazi United yafashe umwanya wa 10 n’amanota icumi.

Indi mikino yabaye uyu munsi, Gasogi United inganyije na Musanze FC igitego 1-1, Bugesera FC yatsindiwe mu rugo na Vision FC ibitego 2-1 naho Marines FC yatsinzwe na Police FC igitego 1-0.

Indi mikino iteganyijwe ku cyumweru tariki 24 Ugushyingo 2024

Gorilla FC izakira Rayon Sports saa cyenda z’amanywa kuri Kigali Pele Stadium

Amagaju FC azakira AS Kigali saa cyenda z’amanywa kuri Stade Huye

Rutsiro FC izakira Mukura VS saa cyenda z’amanywa kuri Stade Umuganda