APR FC yasezerewe muri CECAFA Kagame Cup iri kubera muri Tanzania nyuma yo gutsindwa na Al Hilal yo muri Sudani ibitego 3-1 mu minota 120 y’umukino.

‎Uyu mukino wa ½ wabaye kuri uyu wa Gatandatu tariki 13 Nzeri 2025 kuri KMC Stadium.

‎Muri uyu mukino APR FC yari yagaruye abakinnyi batandatu ari bo Denis Omedi, Ronald Ssekiganda, Ishimwe Jean Pierre, Omborenga Fitina, Niyomugabo Claude na Mugisha Gilbert, bose bari bahamagawe mu makipe y’ibihugu.

‎Umukino watangiye ugenda gake  amakipe yombi yigana kuko mu minota 20 ntayateye mu izamu.

‎Ku munota wa 27, APR FC yabonye uburyo bwiza bwo gufungura amazamu ku mupira wazamukanywe na Hakim Kiwanuka ashatse kuwaha Togui William myugariro aratabara akuraho umupira.

‎Ku munota wa 30, APR FC yatsinze igitego cya mbere ku mupira wahinduwe na Dao Memel ari mu rubuga rw’amahina usanga Rutahizamu Togui William wari uhagaze neza ashyira umupira mu rushundura.

‎Nyuma yo gutsindwa igitego Al Hilal yagarutse mu mukino itangira gusatira izamu rya APR FC ndetse ibona Koruneri eshatu zikurikiranya ariko ubwugarizi bwa APR FC bukomeza guhagarara neza. 

‎Igice cya mbere cyarangiye APR FC yatsinze Al Hilal igitego 1-0.

‎Al Hilal yakomeje gusatira izamu rya APR FC mu gice cya kabiri ndetse ku munota wa 48 yahushije uburyo bwiza bwo kwishyura igitego ku mupira wahawe Birumugisha jean Claude wari imbere ateye umupira ku bw’amahirwe make ujya hanze.

‎Mu minota 60, Ikipe y’Ingabo yongeye gusatira no kuyobora umukino, aho abarimo Ruboneka Jean Bosco na Memel Dao bageragezaga uburyo butandukanye babonamo igitego cya kabiri.

‎Iyo kipe yo muri Sudani ntiyacitse intege

‎kuko ku munota wa 82, Al Hilal yabonye igitego cyo kwishyura gitsinzwe na Abdul Raouf.

‎Iminota 90 yarangiye amakipe yombi anganyije igitego 1-1  hahita hitabazwa iminota 30.

‎Al Hilal yatangiye neza Iminota 15 y’agace ka mbere bidatsinze ku munota wa 93’ yabonye igitego cya kabiri ku mupira wasubijwe inyuma nabi na Ruboneka Jean Bosco usanga Sunday Damilare wari uhagaze neza ahita aroba Umunyezamu Yvan Ruhamyankiko ujya mu izamu.

‎Aka gace karangiye Al Hilal yatsinze APR FC ibitego 2-1.

‎Mu gace ka kabiri, Al Hilal yatangiranye igitego cya gatatu ku mupira wahinduwe na Birumugisha Jean Claude ugarurwa nabi n’umunyezamu Yvan Ruhamyankiko usanga Mohammed  Abdelrahman awushyira mu izamu.

‎Umukino warangiye APR FC yatsinzwe na Al Hilal ibitego 3-1 inanirwa kugera ku mukino wa nyuma wa CECAFA Kagame Cup 2025.

‎Undi mukino wa ½ urahuza Singida Black Stars na KMC zombi muri Tanzania saa Cyenda z’i Kigali.

‎Umukino wa nyuma uteganyijwe ku wa Mbere tariki ya 15 Nzeri 2025.

‎