APR FC yerekanye abakinnyi batatu yasinyishije barimo abanya-Ghana babiri ari bo Richmond Lamptey ukina mu kibuga asatira Seidu Dauda Yassif ukina mu kibuga hagati yugarira n’umunya Mauritania Mamadou Sy ukina asatira amasazerano y’imyaka ibiri.

Ibi byemejwe n’iyi kipe kuri iki Cyumweru tariki 7 Nyakanga 2024 binyuze ku mbuga nkoranyambaga zayo.

Lamptey w’imyaka 27 bivugwa ko yahawe ibihumbi 150 by’amadolari y’Amerika yari kumwe n’Ikipe y’Igihugu ya Ghana mu Gikombe cy’Afurika cyabereye muri Côte d’Ivoire umwaka ushize, gusa akaba umwe mu bakinnyi 20 baheruka gutandukana n’ikipe ya Asante Kotoko nyuma yo kutagira umwaka mwiza w’imikino wa 2023/24.

Richmond Lamptey yari Kapiteni Wungirije wa Asante Kotoko yajemo mu 2021 agatwarana na yo Igikombe cya Shampiyona mu mwaka we wa mbere.

Seidu Dauda Yassif ukina mu kibuga hagati yugarira, yari umukinnyi w’ikipe ya FC Samatex aho yayifashije kwegukana Igikombe cya Shampiyona y’Icyiciro cya Mbere mu mwaka ushize mu gihe wari umwaka wayo wa kabiri ikina mu cyiciro cya mbere.

Uyu musore w’imyaka 23, yasoje umwaka wa Shampiyona atsinze ibitego bitatu anatanga n’imipira itanu yavuyemo ibindi bitego, nubwo ubusanzwe akazi ke ari ugufasha ubwugarizi bw’ikipe ye.

Undi mukinnyi APR FC yemeje ko yayisinyiye ni rutahizamu w’ikipe y’Igihugu ya Mauritania, Mamadou Sy, wakiniraga Nouakchott Kings y’iwabo. 

Mamdou Sy w’imyaka 24 yari amaze iminsi yitwara neza muri Shampiyona y’iwabo ndetse anahamagarwa mu ikipe y’Igihugu nkuru, aho benshi bibuja igitego yatsinze Mali muri CHAN 2023 cyatumye igihugu cye kibona itike ya ¼ mu irushanwa ryaberaga muri Algeria. 

Iyi kipe kandi, iri gukoresha igeragezwa rya nyuma umukinnyi ukomoka muri Brazil, Juan Batista Lopes Da Silva wakinaga mu cyiciro cya kane iwabo.

Biteganywa ko APR FC yerekeza muri Tanzania kuri uyu wa Mbere tariki ya 8 Nyakanga 2024, aho igiye kwitabira imikino ya CECAFA Kagame Cup izabera muri iki gihugu hagati ya tariki 9-21 uku kwezi.