Kuri iki Cyumweru, tariki ya 29 Werurwe 2026, ni bwo kuri Kigali Pelé Stadium habereye imikino ya nyuma yo mu Itsinda B, ry’iyi mikino itegurwa n’Ishyirahamwe ry’Umupira w’Amaguru ku Isi (FIFA). Ikipe y’Igihugu ya Aruba yegukanye igikombe cyo mu itsinda B rya FIFA Series nyuma yo kunyangira Liechtenstein ibitego 4-1.

Aruba yinjiye mu mukino mbere ndetse ibona n’igitego cya mbere ku munota wa 18 gitsinzwe na Jaybrien Romano, mugenzi we Gello Robertha shyiramo icya kabiri ku munota wa 25. Igice cya mbere iyoboye n’ibitego 2-0.

Mu gice cya kabiri Liechtenstein yagitangiye ishaka kwishyura, bidatinze ku munota yatsinze igitego cyinjijwe na Emanuel Zund. Ku munota wa 61, Aruba yasigaye ari abakinnyi 10 nyuma yaho Ostiana Rovien yahawe ikarita ya kabiri y’umuhondo yamuviriyemo umutuku.

Iyi kipe ntiyacitse intege ku munota 69 yashyizemo igitego cya gatatu ku ishoti rikomeye ryatewe na Rainey Breinburg wari hanze y’urubuga rw’amahina. Igitego cya kane muri uyu mukino cyatsinzwe na myugariro wa Liechtenstein, Hofer Jens, wawushyize mu izamu ashaka kuwambura Conner van Kilsdonk wa Aruba wari wacenze n’umunyezamu.

Umukino warangiye Aruba inyagiye Liechtenstein ibitego 4-1, yegukana iri rushanwa, ryakinirwaga bwa mbere mu Rwanda. Umwanya wa gatatu wegukanywe na Tanzania yanyagiye Macau ibitego 6-0. Byatsinzwe na Amancio wa Macau witsinze icya mbere, Bakari Mwamnyeto, Mudathir Yahya, Paul Peter, Novatus Miroshi na Tarryn Allarakhia.

Iyi mikino izakomeza ku wa Mbere tariki ya 30 Werurwe, hakinwa iyo mu itsinda A, Kenya ikina na Grenada mu mukino wo guhatanira Umwanya wa gatatu guhera saa kumi naho u Rwanda rukine na Estonia saa moya n’igice. Imikino yose izabera kuri Stade Amahoro.

Ba uwa mbere mu kumenya amakuru agezweho!!!