BAL 2022: REG BBC yatsinzwe na DUC, US Monastir ibona itike ya ¼
Siporo

BAL 2022: REG BBC yatsinzwe na DUC, US Monastir ibona itike ya ¼

NTAWITONDA JEAN CLAUDE

March 12, 2022

AS Salé 90-96 US Monastir

DUC 92-86 REG BBC

Taliki 12-03-2022

SLAC-CFV Beira (Dakar Arena-16h00)

US Monastir-DUC (Dakar Arena-19h30)

Ikipe ya REG BBC  nta bwo yabashije kwitwara neza mu mukino w’umunsi wa 6 w’imikino y’amajonjora ya BAL 2022 nyuma yo gutsindwa n’ikipe ya DUC yo muri Senegal amanota 92 kuri 86.

Uyu wari umukino wa gatatu ku ikipe ya REG BBC yari imaze gutsinda imikino ibiri ya mbere.  Ikipe ya DUC  na yo yakinaga umukino wa gatatu  yatangiye neza ishaka intsinzi ya mbere aho agace ka mbere yatsinze amanota 19 kuri 16. Agace ka  kabiri, REG BBC yitwaye neza itsinda amanota 24 kuri 21 bituma amakipe ajya mu karuhuko anganya amanota 40 kuri 40.

Uduce tubiri twa nyuma, ikipe ya REG BBC nta bwo yashoboye kwitwara neza kuko yadutsinzwe, amanota 24 kuri 21 na 28 kuri 25 bituma DUC yegukana intsinzi ya mbere ku manota 92 kuri 86.

Adama Diakhite wa DUC ni we witwaye neza muri uyu mukino aho yatsinze amanota 30.

Undi mukino wabaye, ikipe ya US Monastir yo muri Tunisia yatsinze  AS Salé yo muri Maroc amanota 96 kuri 90.

Umukinnyi wa  US Monastir, Radhouane Slimane ni we witwaye neza muri uyu mukino  aho yatsinze amanota 24.

Imikino irakomeza kuri uyu wa Gatandatu taliki 12 Werurwe 2022 aho ikipe ya SLAC ikina na CFV Beira (16h00) naho US Monastir ikine na DUC (19h30).

Kugeza ubu ikipe ya US Monastir ni yo iyoboye urutonde n’amanota 6, ikurikiwe na REG BBC n’amanota 5 ubundi hakaza, CFV Beira, SLAC, DUC na AS Salé  zose zifite amanota 4. Iyi kipe ya US Monastir  ikaba yamaze no gukatisha itike ya ¼  cy’irangiza.

Iyi mikino y’amajonjora ni iyo mu itsinda rya mbere “Sahara Conference”  rigizwe na  US Monastir  (Tunisia), AS Salé (Maroc), SLAC (Guinea), DUC (Senegal), Ferroviário da Beira (Mozambique) na REG BBC (Rwanda). Nyuma yo gukina hagati yayo, amakipe 4 ya mbere azakomeza muri ¼.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA