BAL 2023 : Ikipe ya Al Ahly  yegukanye igikombe

BAL 2023 : Ikipe ya Al Ahly yegukanye igikombe

NTAWITONDA JEAN CLAUDE

May 28, 2023

Al Ahly 80-65 AS Douanes

Ikipe ya Al Ahly yo mu Misiri ni yo yegukanye igikombe  cy’irushanwa ry’Afurika ry’amakipe yatwaye ibikombe iwayo muri Basketball mu bagabo  “Basketball Africa League (BAL 2023)”.

Iri rushanwa ryari rikinwe ku nshuro ya 3 ryasojwe ku wa Gatandatu taliki 27 Gicurasi 2023 aho ikipe ya Al Ahly yitwaye neza igatsinda ku mukino wa nyuma ikipe ya AS Douanes yo muri Senegal amanota 80 kuri 65.

Iyi kipe ya Al Ahly ni inshuro ya mbere yari yitabiriye iri rushanwa kuko inshuro ebyiri ziheruka (2021 na 2022) hitabiriye ikipe ya Zamalek ndetse inatwara igikombe muri 2021 ubwo BAL yakinwaga ku nshuro ya mbere.

Ikipe ya Stade Malien yo muri Mali ni yo yegukanye umwanya wa 3 nyuma yo gutsinda ikipe ya Petro de Luanda yo muri Angola amanota 73 kuri 65.

Umukino wa nyuma wa BAL 2023 wahuje Al Ahly na AS Douanes  wakurikiranwe n’abanyacyubahiro batandukanye barimo Perezida w’u Rwanda, Paul Kagame na Madamu Jeannette Kagame ndetse n’abandi barimo umuyobozi wa BAL, Amadou Gallo Fall, Umuyobozi wungirije wa NBA, Mark Tatum, Umuyobozi nshingwabikorwa wa NBA Africa, Victor Williams, Perezida wa FIBA Afrique, Anibal Aurelio Manave,  Perezida wa CAF, Dr Patrice Tlhopane Motsepe n’Umuyobozi wa ‎Toronto Raptors, Ujiri Masai.

Mu bihembo byatanzwe

Umukino wa Stade Malien, Aliou Diarra yahawe igihembo cy’uwarushije abandi kuzibira “BAL Defensive Player of the Year 2023”. Will Perry  ukinira ikipe ya CFV-Beira   yahawe igihembo nk’umukinnyi wagaragaje koroherana “BAL Sportsmanship Award 2023”.

Anunwa “Nuni” Omot ukinira ikipe ya Al Ahly ni we wabaye umukinnyi witwaye neza mu irushanwa ryose “ 2023 BAL Most Valuable Player Award”.

Mamadou Gueye, umutoza mukuru wa AS Douanes ni we wahawe igihembo nk’umutoza witwaye neza “BAL Coach of the Year 2023”.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA