Umuhanzikazi Bwiza Emerance uzwi nka Bwiza yatangaje ko Pamela yagize uruhare mu ndirimbo ye yakoranye na The Ben, anashimira uyu muhanzi bafatanyije gukorana indirimbo ‘Best Friend’.

Mu kiganiro yagiranye n’itangazamakuru, Bwiza yavuze ko yatunguwe n’uburyo Pamela yabashyigikiye akajya abaha ibitekerezo.

Yagize ati: “Best Friend ni indirimbo nari maranye igihe kinini muri studio, naje kwegera The Ben nifuza ko ngize amahirwe yakwemera tukayikorana, ndamushimira cyane ni umuntu ushyigikirana atitaye ngo uri umwana, yicisha bugufi cyane.”

Yongeraho ati: “Ndanashimira umudamu Pamela, sinari nzi ko ashyigikirana kuri ruriya rwego, ndabyibuka yaradufashaga akaduha ibitekerezo by’uko twazafata amashusho, akaza aho twayafatiraga akabigira ibye, ikitameze neza akarwana nacyo.”

Uyu muhanzikazi avuga ko ari umugisha yagize wo gufashwa n’abahanzi bakomeye mu Rwanda barimo Bruce Melodie na The Ben akanavuga ko batamugoye.

Indirimbo Best friend ni indirimbo bashyize ahagaragara ku wa Kabiri tariki 19 Ugushyingo 2024, aho kugeza ubu imaze kurebwa n’abasaga 1000 mu masaha 15 gusa.

Amashusho yayo yafashwe anatunganywa na John Elarts ari nawe wayoboye amashusho y’indirimbo Ni forever ya The Ben.

Bwiza ni umwe mu bakobwa bahagaze neza mu muziki nyarwanda, akaba ari na we mukobwa umaze gukorana  indirimbo na The Ben na Bruce Melodie basa nk’abahanganye mu muziki nyarwanda.