Ikipe ya Al Hilal SC yo muri Sudani y’abakinnyi 10 yatsinze Mouloudia Club d’Alger [MC Alger] yo muri Algeri ibitego 2-1, itangira neza imikino y’amatsinda y’amakipe yabaye ayambere iwayo CAF Champions League, aho umukino wasojwe n’imvururu n’ubushyamirane bw’abakinnyi.

Uwo mukino wa mbere wo mu itsinda C wabereye kuri Stade Amahoro i Kigali, kuri uyu wa Gatanu, tariki ya 21 Ugushyingo 2025, ukaba wari umukino wa mbere w’Amatsinda ya CAF Champions League ubereye bwa mbere muri iyi Stade.

Ikipe ya Al Hilal SC yahisemo kwakirira uwo mukino mu Rwanda kubera ko mu gihugu cya Sudani hari umutekano muke utatuma habera imikino nk’iyo n’andi marushanwa.

Ni umukino watangiye utuje ku mpande zombi nta kipe irema uburyo bukomeye bwo gutsinda igitego.

Ku munota wa 15’ Al Hilal yabonye uburyo bwiza bwo gufungura amazamu ku mupira mwiza wahinduwe mu rubuga rw’amahina na Adama Coulibali abarimo Jean Claude Bigirumugisha bari imbere y’izamu bananirwa kuwushyira mu rushundura.

Iminota yakurikiyeho umukino waranzwe no gukora amakosa ku mpande zombi bituma nta buryo bubyara igitego kuri buri ruhande.

Mbere y’uko igice cya mbere kirangira, umusifuzi wa Kane yongeyeho iminota ine y’inyongera.

Ku munota wa 45+2’ Al Hilal SC yafunguye amazamu ku mupira mwiza wahinduwe Jean Claude Bigirumugisha awushyirwa mu izamu na Kapiteni Abdelrazig Taha Yagoub Omer.

Igice cya mbere cyarangiye Al Hilal yatsinze MC Alger igitego 1-0.

Mu igice cya kabiri, MC Alger yagurukanye imbaraga nyinshi itangira, bidatsinze ku munota wa 53’ yabonye igitego cyo kwishyura ku mupira wahinduwe mu rubuga rw’amahina na Oussama Benhaoua ushyirwa mu izamu na myugariro wa Al Hilal Mustafa Mohammed yitsinze.

Ku munota wa 74’ Umutoza wa Al Hilal, Laurentieu Reqhecampf, yakoze imipinduka ebyiri havamo Abdelrazig Taha Yagoub Omer na Adama coulibali basimburwa na Mohammed Abdelrahman na Ahemd Salem M’Bareck.

Nyuma y’umunota umwe gusa, izi mpinduka zatanze umusaruro kuko Steve Ebuela yahinduye umupira mwiza imbere y’izamu usanga Mohammed Abdelrahman wari uhagaze neza atsinda igitego cya kabiri.

Ku munota wa 87’ Saeed Ahmed wa Al Hilal yahawe ikarita ya Kabiri y’umuhondo bimuviramo itukura.

Iminota wa nyuma y’umukino yihariwe cyane na MC Alger yashakaga igitego cya kabiri cyo kwishyura ndetse yabonye koruneri ebyiri zikurikiranya ariko ba myugariro n’umuzamu wa Al Hilal bakomeza guhagarara neza.

Umukino warangiye Al Hilal SC yatsinze MC Alger ibitego 2-1, itangira neza imikino y’amatsinda ya CAF Champions League.

Hadutse imvururu nyuma y’umukino

Icyakora wasojwe n’imvururu zivanzemo ibipfunsi n’imigeri hagati y’abakinnyi b’impande zombi, hitabazwa Polisi y’u Rwanda n’abandi bashinzwe umutekano.

Polisi yahisemo guherekeza amakipe yombi kugeza ageze mu rwambariro hirindwa ko bakongera gushyamirana.

Iyi kipe yo muri Sudani izagaruka mu kibuga, yakirwa na FC Saint-Éloi Lupopo yo muri Repubulika Iharanira Demokarasi ya Congo, mu gihe MC Alger izakira Mamelodi Sundowns yo muri Afurika y’Epfo. Imikino yombi izakinwa tariki ya 28 Ugushyingo 2025.

Ba uwa mbere mu kumenya amakuru agezweho!!!