Ikipe y’Igihugu ya Cameroon yatsinze iya Afurika y’Epfo ibitego 2-1 naho Maroc itsinda Tanzania igitego 1-0, zombi zibona itike ya ¼ cy’Igikombe cya Afurika.

Ku Cyumweru tariki 4 Mutarama 2025, ni bwo hakomeje gukinwa imikino ya 1/8 y’Igikombe cya Afurika kiri kubera muri Maroc.

Umukino wari utengerejwe wahuje Cameroon na Afurika y’Epfo kuri Al-Medina Stadium iherereye mu Mujyi wa Rabat muri Morocco. 

Ni umukino watangiye wegeranye cyane, umupira ukinirwa cyane hagati mu kibuga.

Mu minota 20, Cameroon yagerageje kugera imbere y’izamu kenshi ishaka igitego cya kare ariko ba myugariro ba Afurika y‘Epfo n’umunyezamu Ronwen Williams bakomeza guhagarara neza. 

Ku munota wa 33, Cameroon yafunguye amazamu ku mupira wavuye kuri Samuel Kotto, usanga Junior Tchamadou wari uhagaze neza awushyira mu izamu. 

Igice cya mbere cyarangiye Cameroon itsinze Afurika y’Epfo igitego 1-0. 

Mu igice cya kabiri, Cameroon yakomeje gukina neza, bidatsinze ku munota wa 47 itsinda igitego cya kabiri ku mupira wahinduwe ku ruhande rw’ibumoso na Mahamadou  Nagida, usanga Christian kofane wari uhagaze neza awushyiraho umutwe uruhukira mu izamu.

Mu minota 60, iyi kipe yakomeje kwiharira cyane umupira hagati mu kibuga ndetse ibona amahirwe yo gutsinda igitego cya gatatu ariko bananirwa kuyabyaza umusaruro. 

Ku munota wa 88, Afurika y’Epfo yagabanyije umwenda ibona igitego kimwe cyatsinzwe Evidence Makgopa ku mupira wahinduwe na Aubrey Modiba awushyira mu izamu. 

Umukino warangiye Cameroon itsinze Afurika y’Epfo ibitego 2-1, ibona itike yo gukina imikino ya ¼ cya CAN 2025.

Mu mukino wabanjirije uyu, Ikipe y’Igihugu ya Maroc yasezereye iya Tanzania iyitsinze igitego 1-0 cyinjijwe na Brahim Diaz ku munota wa 64.

Uyu rutahizamu wa Maroc ni we umukinnyi umaze gutsinda ibitego byinshi muri iri rushanwa (4) aho byose yabitsinze muri buri mukino.

Bivuze ko muri ¼, Maroc izahura na Cameroon mu mukino uteganyijwe tariki 9 Mutarama 2026 saa 21:00.

Kuri uyu wa Mbere, harakomeza imikino ya ⅛ aho Misiri ikina na Benin saa 18:00, mu gihe Nigeria ikina na Mozambique saa 21:00.

Ba uwa mbere mu kumenya amakuru agezweho!!!