Igikombe cya Afurika ni irushanwa riba buri myaka ibiri, rikaba ari n’urubuga rwo kureberaho ibyamamare byiyereka Isi yose mu makipe y’Ibihugu bikomokamo ndetse abandi bakigaragaza nk’ibihangange nyuma yo kwerekana impano ya ruhago bityo bakabengukwa n’amakipe y’ibigugu ku Isi.

Iki gikombe kizabera mu gihugu cya Maroc, guhera ku Cyumweru, tariki ya 21 Ukuboza 2025 kugeza ku ya 18 Mutarama 2026.

Ni inshuro ya kabiri iki gihugu cya Maroc kiri mu Majyaruguru y’Umugabane wa Afurika kigiye kwakira iri rushanwa nyuma y’iryo cyakiriye mu 1988, gusa kikaba cyarashoboraga kwakira icyo gikombe  mu 2015 ariko kirabyanga kubera gutinya icyorezo cya Ebola, cyari cyibasiye ibihugu byo muri Afurika muri icyo gihe, cyane cyane ibyo mu Burengerazuba.

Imvaho Nshya igiye kubageza ahabikinnyi bahanzwe amaso na benshi muri icyo gikombe.

Abakinnyi baturutse ku migabane itandukanye y’Isi b’Abanyafurika bahagaze neza muri shampiyona bakinamo  ndetse n’abakunzi ba ruhago ku Isi yose bategereje kubahanga amasomo batanga ibyishimo.

Kuri uru rutonde tugiye guhera ku mwanya wa munani tuze guherutse uwa mbere witezwe na benshi muri CAN 2025.

8. Victor Osimhen

Rutahizamu w’Umunya-Nigeria, Victor Osimhen ukinira Galatasaray yo mu Turukiya, ni inyenteri muri ba rutahizamu ku mugabane w’u Burayi.

Osimhen w’imyaka 26 gusa yatangiye gukinira Ikipe y’Igihugu Nkuru ya Nigeria (Super Eagles) afite imyaka 18 gusa mu 2017, nyuma yo guca mu byiciro by’abito byayo.

Kuri ubu amaze kuyitsindira ibitego 20 mu mikino 27 ndetse aza ku mwanya wa Kabiri mu bamaze kunyeganyeza inshundura kenshi muri Super Eagles nyuma ya Rashidi Yekini ufite ibitego 37.

Osimhen amaze gukina Irushanwa ry’Igikombe cya Afurika rimwe, yitabiriye mu 2019, akaba yarabuze amahirwe yo gukina irya 2021 kubera icyorezo cya COVID-19.

7. Bryan Mbeumo

Rutahizamu w’Umunya- Cameroun, Bryan Mbeumo ukinira Manchetser United yo mu Bwongereza ni umwe mu bakinnyi bitezweho kuzeraka imikinire idasanzwe muri CAN 2025, ahanini bishingiye ku buryo yitwara mu ikipe y’Igihugu no mu ikipe ye ya shampiyona.  

Uyu mukinnyi w’imyaka 26 yageze muri Manchetser United mu mpeshyi y’uyu mwaka wa 2025, avuye muri Brentford yatsindiye ibitego 20 muri Shampiyona y’u Bwongereza.

Muri uyu mwaka w’imikino amaze gutsinda ibitego birindwi mu marushanwa yose akinira Manchester United.

6. Sadio Mané

Umunya-Sénégal, Sadio Mané w’imyaka 33 amaze gutsindira Al Nassr ikina muri Shampiyona y’Icyiciro cya mbere muri Arabie Saoudite, kuri ubu igeze ku munsi wa 9 ibitego bitatu anatanga imipira irindwi yavuyemo ibindi bitego.

Sadio ni kapiteni wungirije w’Ikipe y’Igihugu ya Sénégal (Intare za Teranga),  ndetse ni na we umaze igihe afite agahigo ko kuyitsindira ibitego byinshi bigera kuri 51 mu mikino 119 aho akurikirwa na Hanry Camara ufite ibitego 31 gusa wasezeye ku mupira w’amaguru.

Mane amaze gutsinda ibitego icyenda mu marushanwa ane y’Igikombe cya Afurika amaze kwitabira, harimo mu 2017, 2019, 2021 n’iriheruka rya 2023 ryabereye muri Cameroun, Igihugu cye cyaryegukanye ku nshuro ya mbere mu mateka yacyo.

Sadio yegukanye yafashije igihugu cye kwegukana iri rushanwa ku nshuro ya mbere mu mateka mu 2021.

5. Yassine Bounou

Umunyezamu wa Al-Hilal yo muri Arabia Soudite ni umwe bakinnyi bayifashije gusoreza ku mwanya wa Kabiri muri Shampiyano ya 2025/26, aho yamaze imikino icyenda atinjizwa igitego mu izamu.

Yassine Bounou watangiye gufatira Ikipe y’Igihugu ya Maroc mu 2013, ni ku nshuro ya Gatanu agiye gukina igikombe cya Afurika.   

Bounou aherutse kwegukana igihembo cy’umunyezamu mwiza mu bagabo muri Afurika, mu 2025.

4. Pierre Emerick Aubameyang

Rutahizamu n’Umunya- Gabon, Pierre Emerick Aubameyang ukinira Olympique de Marseille yo mu Bufaransa ni umwe mu bategerejwe muri iri rushanwa.  

Uyu mukinnyi watangiye gukinira ikipe y’igihugu mu 2009 amaze gukinira igihugu cye imikino 84 ndetse ni we mukinnyi umaze gutsindira Gabon ibitego byinshi mu mateka aho afite ibitego 39.

Muri Shampiyona y’uyu mwaka Aubameyang afite ibitego bitanu mikino 10.

3. Ayoub El Kaabi

Umunya-Maroc, Ayoub El Kaabi ukinira Olympiacos yo mu Bugereki ni umwe mu Banyafurika bamaze gutsinda ibitego byinshi muri shampiyona zo ku Mugabane w’u Burayi, aho mu mikino 14 gusa amaze gutsinda ibitego 12 muri shampiyona y’u Bugereki.

Mu mwaka ushize w’imikino wa 2024/25 El Kaabi yatsinze ibitego 41 mu marushanwa yose yakinnye.

2. Mohamed Salah

Umwami wa Ruhago ya Misiri ategerejwe n’abatari bacye haba iwabo, muri Afurika ndetse n’Isi yose muri rusange.

Nyuma yo gutsindwa na Sénégal ku mukino wa nyuma w’Igikombe cya Afurika mu 2022, kuri penaliti 4-2, amakipe yombi yari yanganyije 0-0, Mohamed Salah w’imyaka 33 arifuza gusezera mu Ikipe y’Igihugu nibura ayihesheje Igikombe cya Afurika.

Uyu rutahizamu watangiye gukinira Misiri mu 2011 amaze gukinira Igihugu cye imikino 107 ndetse yagitsindiye ibitego 63, arifuza guca agahigo k’umukinnyi watsindiye, Les Pharaons ibitego byinshi ubusanzwe kaciwe na Hossam Hassan watsinze ibitego 68.

Mohamed Salah aherutse gukora amateka muri Premier League aho yabaye umukinnyi wa mbere wagize uruhare mu bitego 277 mu ikipe imwe, umwanya yahigitseho Wayne Rooney wakiniye Manchetser United, aho we yagize uruhare rw’ibitego 276.

Muri Shampiyona y’uyu mwaka Mo Saha ntabwo yagize itangiriro nziza kuko afite ibitego bine ku mikino 13.

1. Achraf Hakimi

Umunya- Maroc Achraf Hakimi w’imyaka 26 akaba na myugariro wa Paris Saint-Germain yo mu Bufaransa aherutse guhabwa igihembo cy’umukinnyi mwiza w’Umunyafurika mu mwaka wa 2025.

Ni nyuma yo kugira umwaka mwiza cyane mu Ikipe ya Paris Saint-Germain aho aho yayifashije gutwara ibikombe bitanu birimo UEFA Champions League yatwaye bwa mbere mu mateka yayo.

Uyu mukinnyi yitezweho gufasha Maroc kwegukana igikombe cya Afurika iheruka gutwara mu 1976.

Ba uwa mbere mu kumenya amakuru agezweho!!!