Umuraperikazi w’Umunyamerika Cardi B yiseguye ku bakunzi b’ibihangano bye ababwira ko na we aho bigeze yiyumvaho ko ari umubeshyi ukomeye kubera ko umuzingo we mushya utagisohotse igihe yari yarabateguje.

Ibi uyu muhanzi yabyanditse kuri uyu wa Gatatu tariki 20 Ugushyingo 2024, asa nk’utebya ku mbuga nkoranyambaga ze, abwira abamukurikira ko noneho nawe amaze kwiyumvamo ko ari umubeshyi.

Yanditse ati: “Noneho nanjye ndimo kwiyumva nk’umubeshyi ukomeye, ibaze ko Alubumu yanjye itakibonetse mu kwezi kwa Mutarama 2025, kubera ko hari ibikingoye bitaratungana.”

Yongeraho ati: “Uyu mwaka wari ugoye kandi uteye ubwoba, wari wuzuyemo imbogamizi, sinzi ibyambayeho sinabasha no kubisobanura, icyo nzi cyo wari urimo imbogamizi nyinshi gusa muri byose mba ngamije kubaha ibyiza mukwiye.”

Nubwo bitagikunze ko umuzingo wa Card B ugera ku bakunzi be muri Mutarama 2025, ariko yizeye ko umwaka wa 2025 awiteze nk’umwaka w’impinduka kandi w’iterambere kuri we.

Muri uyu mwaka ni bwo havuzwe inkuru zitandukanye ku gutandukana k’uyu muhanzi n’umugabo we Off set, ari nabyo agarukaho ko byamubereye imbogamizi mu gukora ku mushinga w’umuzingo we.