Ikipe ya Real Madrid yatsinze Manchester City ibitego 2-1, Arsenal itsinda Bayern Leverkusen 2-0 naho PSG inyagira Chelsea ibitego 3-0, zombi zikatisha itike ya 1/4 muri UEFA Champions League ya 2025/26.

Mu ijoro ryo ku wa kabiri, tariki ya 17 Werurwe 2026, hakinwe imikino yo kwishyura ya 1/8 cy’iri rushanwa rihuza amakipe yabaye aya mbere iwayo ku Mugabane w’u Burayi.

Umukino wabimburiye indi ni uwahuje Sporting yo muri Portugal yakiriye FK Bodø/Glimt yo muri Norvège, isabwa kuyinyagira kugira ngo ikomeze, dore ko hanze yari yahatsindiwe ibitego 3-0.

Muri uyu mukino Sporting yatsinze ibitego 5-0, ibona itike yo gukina ¼ cy’iri rushanwa. Ni ibitego byashyizwemo na Gonçalo Inácio, Pedro Gonçalves, Luis Suárez, Maximiliano Araújo na Rafael Nel.

Arsenal yakiriye Bayer Leverkusen kuri Emirates Stadium, isabwa kuhatsindira kuko umukino ubanza yanganyirije mu Budage igitego 1-1.

Iyi kipe yo mu Bwongereza yitwaye neza kuko yatsinze ibitego 2-0 byatsinzwe na Eberechi Eze ku munota wa 36 na Declan Rice ku wa 63, bituma ikomeza ku giteranyo cy’ibitego 3-1 mu mikino yombi.

Chelsea FC na yo mu Bwongereza yatsindiwe mu rugo na Paris Saint-Germain ibitego 3-0 byiyongera kuri 5-2 yatsinzwe mu mukino ubanza, isezererwa ku giteranyo cy’ibitego 8-2.

Ni ibitego byatsinzwe na Khvicha Kvaratskhelia ku munota wa gatandatu, Bradley Barcola ku wa 14, ndetse na Senny Mayulu washyizemo agashinguracumu ku munota wa 62.

Undi mukino wari witezwe na benshi n’uwa Manchester City yo mu bwongereza yasabwaga kwigaranzura Real Madrid yo muri Espagne, yari yayitsinze ibitego 3-0 mu mukino ubanza, ikareba ko yabyishyura.

Iyi kipe ntiyahiriwe n’intangiriro z’umukino kuko ku munota wa 20 w’umukino, Bernardo Silva wa Man City yakoze umupira ari mu rubuga rw’amahina, ahabwa ikarita itukura na penaliti kuri Real Madrid yavuyemo igitego cya mbere cyinjijwe na Vinicius Junior.

Ni igitego cyishyuwe na Erling Haaland ku munota wa 41, ariko ku munota wa gatatu w’inyongera y’igice cya kabiri, Vinicius Junior, atsinda igitego cya kabiri cya Real Madrid cyayihesheje itike ya ¼.

Indi mikino yo kwishyura muri 1/8 irakomeza kuri uyu wa Gatatu aho guhera Saa Moya n’Igice FC Barcelona yakira Newcastle United, Bayern Muchen irakira Atalanta, Liverpool yakire Galatasaray naho Tottenham ikine na Atletico Madrid. Iyi mikino iratangira saa Yine z’ijoro.

Ba uwa mbere mu kumenya amakuru agezweho!!!