Ikipe y’Igihugu ya Moroc yatsinze iya Madagascar ibitego 3-2 yegukana Igikombe cya Shampiyona Nyafurika ihuza abakina imbere mu bihugu byabo (CHAN2024), iba inshuro ya gatatu yegukanye iri rushanwa ryakinwaga ku nshuro ya munani.

Uyu mukino wa nyuma wabaye kuri uyu wa Gatandatu tariki ya 30 Kanama 2025, ubera kuri Moi International Sports Centre Kasarani iherereye Nairobi muri Kenya yari yuzuye abafana.

Ni umukino witabiriwe na Perezida wa Kenya, William Samoei Ruto ari kumwe na Perezida wa CAF, Dr Patrice Motsepe na Perezida wa FIFA, Gianni Infantino n’abandi banyacyubahiro batandukanye.

Ikipe y’igihugu ya Madagascar yatangiranye imbaraga nyinshi bidatinze ku munota wa cyenda yafunguye amazamu ku ishoti rikomeye ryatewe na Felicite Mantasoa ari inyuma y’urubuga rw’amahina umupira ujya mu izamu.

Nyuma yo gutsindwa igitego Maroc yinjiye mu mukino itangira gusatira ishaka igitego cyo kwishyura.

Ku munota wa 27, Maroc yabonye igitego cyo kwishyura cyatsinzwe na Youseff Mehri n’umutwe ku mupira yari ahawe na Khalid Baba.

Maroc yarushaga Madagascar cyane yabonye igitego cya kabiri ku munota wa 44, gitsinzwe na Oussama Lamlioul.

Igice cya mbere cyarangiye Maroc yatsinze Madagascar ibitego 2-1.

Ku munota wa 68, Madagascar yabonye igitego cya kabiri cyo kwishyura ku mupira wahinduwe na Felicite Mantasoa usanga Toky Rakotondraibe wari uhagaze neza umupira awushyira mu rushundura.

Ku munota wa 80, Maroc yatsinze igitego cya gatatu cyatsinzwe na Rutahizamu Oussama Lamlioul ku ishoti rirerire yateye nko muri metero 30, umunyezamu wa Madagascar Michel Ramandimbisoa ananirwa gukoraho umupira ujya mu rushundura.

Umukino warangiye Maroc yatsinze Madagascar ibitego 3-2, yegukana irushanwa rya CHAN 2024 ryakinwaga ku nshuro ya munani kuva mu 2009.

Maroc yabaye Ikipe y’igihugu ya mbere yegukanye iri rushanwa inshuro eshatu (2018,2020 na 2025).

Umwanya wa gatatu wegukanywe na Senegal itsinze Sudani Penaliti 4-2 nyuma yo kuganya igitego 1-1 mu minota 90 isanzwe y’umukino.

Mu bihembo byatanzwe, Oussama Lamlioui wa Maroc yatowe nka rutahizamu w’irushanwa kuko yatsinze ibitego bitandatu naho mugenzi we, Mohamed Hrimat aba umukinnyi w’irushanwa.

Marc Diouf wa Senegal yabaye umunyezamu mwiza w’irushanwa.

Mu nshuro zirindwi iri rushwana riheruka kubamo kuva muri 2009, ryegukanywe na Repubulika Iharanira Demokarasi ya Congo (2009 & 2016), Tunisie (2011), Libye (2014), Senegal (2022) na Maroc (2018 na 2020 na 2025).