Cricket: Nyuma yo kwitwara neza muri Nigeria,  ikipe y’u Rwanda igiye kwitegura  “Kwibuka 2022”

Cricket: Nyuma yo kwitwara neza muri Nigeria,  ikipe y’u Rwanda igiye kwitegura  “Kwibuka 2022”

Imvaho Nshya

April 7, 2022

Ikipe y’u Rwanda mu mukino wa Cricket mu bagore nyuma yo kwegukana  igikombe cy’irushanwa mpuzamahanga ryateguwe n’ishyirahamwe ry’umukino wa Cricket muri Nigeria  “NCF Women’s T20 International Tournament 2022” igiye kwitegura irushanwa mpuzamahanga ryo kwibuka “Kwibuka Women’s T20 Tournament 2022” rizabera mu Rwanda taliki 09 kugeza 18 Kamena 2022.

Iyi kipe y’u Rwanda yitwaye neza yegukana igikombe  muri iri rushanwa mpuzamahanga ryabereye i Lagos muri Nigeria kuva taliki 28 Werurwe kugeza  03 Mata  2022 aho  ryitabiriwe n’amakipe 5 ari yo Nigeria, Ghana, Sierra Leone, u Rwanda na Gambia.

Nyuma yo kugaruka mu Rwanda, kapiteni w’ikipe y’igihugu,  Bimenyimana Diane yatangaje ko bishimiye kwegukana iri rushanwa, ashimangira ko babikesha gukorera hamwe nk’ikipe.

Kapiteni w’ikipe y’igihugu,  Bimenyimana Diane

Akomeza avuga ko  kwegukana iri rushanwa byabongereye imbaraga mu kwitegura irushanwa mpuzamahanga ryo Kwibuka 2022. Ati : Twabonye aho duhagaze, tugiye gukomeza gukora kugira ngo tuzatsindire  umwanya wa mbere kuko  ubushize twabaye aba 3, uyu mwaka rero turashaka igikombe.”

Umutoza mukuru w’ikipe y’u Rwanda, Leonard Nhamburo  yatangaje ko iri rushanwa ryaberetse aho ikipe ifite imbaraga ndetse n’ahari intege nke ari byo  bagiye gukosora muri iyi minsi kugira ngo bazitware neza mu irushanwa ryo “Kwibuka 2022”.

Umutoza mukuru w’ikipe y’u Rwanda, Leonard Nhamburo 

Perezida w’ishyirahamwe ry’umukino wa Cricket mu Rwanda “RCA”, Steven Musaale yatangaje ko ikipe y’u Rwanda mu bagore yari imaze igihe idakina kuko yaherukaga gukina irushanwa ryo “Kwibuka 2021” muri Kamena 2021.

Akomeza avuga ko mbere yo kwitabira irushanwa ryo “Kwibuka 2022” bafashe icyemezo  cyo kohereza iyi kipe muri Nigeria kugira ngo barebe  uko ihagaze. Ati : “ Bitwaye neza kuko bakurikije ibyo abatoza bababwiye n’ubwo batsinzwe umukino ubanziriza uwa nyuma njye nari mfite icyizere ko tugomba gutwara igikombe”.

Perezida wa RCA, Steeven Musaale agaruka ku irushanwa ryo “Kwibuka 2022” yemeje ko uyu mwaka hazitabira amakipe menshi kandi akomeye harimo ikipe ya mbere muri Afurika, Zimbabwe hakiyongeraho ikipe y’u Budage na Brazil zizaturuka hanze y’umugabane w’Afurika.

Perezida wa RCA, Steeven Musaale

Ati : “ Ibi ni ibyo kwishimira kuko irushanwa ryo Kwibuka  ririmo kugenda ryaguka, mbere hitabiraga amakipe yo muri aka Karere  nyuma hiyongeramo ayo muri Afurika y’Amajyepfo n’Iburengerazuba.”

Ubwo iri rushanwa riheruka muri 2021 ryari ryitabiriwe n’amakipe 5 ari yo  u Rwanda, Namibia, Botswana, Kenya na Nigeria mu gihe ikipe ya Uganda itabashije kwitabira kubera COVID-19. Ikipe ya Kenya  ni yo yegukanye igikombe itsinze ku mukino wa nyuma Namibia naho ikipe y’u Rwanda yegukana umwanya wa 3 itsinze Nigeria.

Irushanwa ryo “Kwibuka 2022” rishobora kwitabirwa n’amakipe 10 ari yo u Rwanda, Zimbabwe, Brazil, u Budage, Kenya, Namibia, Botswana, Nigeria, Uganda na Tanzania.

Amafoto

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA