Minisitiri w’Ubumwe bw’Abanyarwanda n’Inshingano mboneragihugu, Dr. Bizimana Jean Damascène, yanenze Abanyamakuru batakuye amasomo ku macakubiri yagejeje u Rwanda kuri Jenoside yakorewe Abatutsi mu 1994.

Ni bimwe mu byo yagarutseho ku mugoroba wo ku wa Gatanu tariki 10 Mata 2026, ubwo yari yifatanyije n’abanyamakuru hamwe n’imiryango y’abari abanyamakuru bazize Jenoside yakorewe Abatutsi.

Ni igikorwa cyo kwibuka abanyamakuru bishwe muri Jenoside yakorewe Abatutsi mu 1994, cyabereye ku cyicaro cy’Urwego rw’Igihugu rw’Itangazamakuru, RBA.

Dr. Bizimana yibukije abanyamakuru n’abanyapolitike bo mu Rwanda ko badakwiye kwirengagiza amateka y’Igihugu ngo barebere ababiba urwango n’amacakubiri.

Yagize ati: “Mu Gihugu cyabayemo Jenoside gifite amateka akakaye y’irondabwoko, irondakarere na Jenoside yakorewe Abatutsi nta munyamakuru cyangwa umunyapolitike wagombye kwitwara nkaho ari mu gihugu kidafite uyu mwihariko.”

Akomeza anenga abanyamakuru yise ko barenzwe n’amahoro baherutse kumwibasira kuko yari yamaganiye kure ibikorwa by’abanyapolitike bigoreka amateka ya Jenoside yakorewe Abatutsi.

Ati: “Biragaragara ko hari abanyamakuru n’abiyita abanyapolitike bafite umurengwe batita ku mwihariko w’irondabwoko n’ubukana bwa Jenoside yakorewe Abatutsi yabaye muri iki Gihugu. […] Nigeze kuvuga kuri Ingabire Victoire n’ibyaha yahamijwe n’inkiko ariko hari abanyamakuru bagiye baranyikoma kubera ko navuze umuntu w’inshuti yabo ubaha amafaranga, umunyamakuru ujya gukora inkuru arengera ibyaha byakozwe na Ingabire ntaho atandukaniye n’abasakaje imvugo z’urwango.”

Yanenze kandi bamwe mu bavuga ko akoresha imvugo imeze nk’iya Dr. Léon Mugesera wakanguriye iyicwa ry’Abatutsi mbere gato ya Jenoside yakorewe Abatutsi, ashimangira ko ibyo bavuga nta kuri kurimo kuko azi ububi bwa Jenoside n’amagambo akwiye gukoresha.

Minisitiri Dr. Bizimana agaragaza ko umunyamakuru nk’uwo aba atazi aho u Rwanda rwavuye, aho ruri, n’aho rushaka kuganisha abana ba rwo hazira Jenoside.

Yagarutse ku ruhare rukomeye rwa Joseph Serugendo, uri mu bashinze radiyo RTLM akaba n’Umujyanama mu bya Tekiniki kuri iyo radiyo, muri Jenoside yakorewe Abatutsi.

Ati: “Serugendo yari mu nterahamwe zari zikaze. Serugendo yari umuhanga mu bintu bya tekiniki ya radiyo, ni we wari umuyobozi mu bya tekinike kuri radiyo Rwanda noneho bamuha RTLM akajya abihuza byombi. Ni na we wagiriye inama RTLM ku bikoresho igomba kugura mu Budage. […] n’amashanyarazi ya RTLM yahujwe na perezidansi ya Repubulika kugira ngo RTLM itajya ibura amashanyarazi, ibyo byatumaga RTLM ikora igihe cyose.”

Uyu munyamakuru yahamijwe ibyaha bya Jenoside yakorewe Abatutsi ku itariki 12 Kamena 2006, urukiko rumukatira gufungwa imyaka 6. Mu byaha byamuhamye, harimo icyo guhamagarira abantu gukora Jenoside, guhamagarira abantu kwica Abatutsi byakorwaga nta rujijo biteye, kandi bigakorwa ku mugaragaro. Ibyo yabikoze mu mugambi utihishiriye wo gukora Jenoside.

Ibi byaha byose umunyamakuru Serugendo yarabyemeye kandi abisabira imbabazi. Minisitiri Dr. Bizimana avuga ko Serugendo kimwe n’abandi banyamakuru batigeze bafata gerenade ngo bazitere mu bantu, ntibafashe imbunda ngo barase, ndetse ntibanafashe ntampongano y’umwanzi ahubwo ngo bicishije amagambo n’inyandiko.

Agira ati: “Umunyamakuru akenshi yicisha amagambo, yicisha inyandiko kandi amagambo arica.”

Akangurira abanyamakuru kwigira kuri bagenzi babo beza bahisemo kurengera umwuga wabo, baricwa kubera kwanga gukwirakwiza urwango no kwanga kurebera akarengane.

Dr. Bizimana yibukije umuhungu wa Habyarimana, Habyarimana Jean Luc, ko kuvuga ko Jenoside itateguwe kandi itangazamakuru ryakoreraga mu gihugu cyayoborwaga na se Habyarimana Juvénal Ari ugukina kandi nk’Abanyarwanda batazemera kugoreka amateka.

Umuyobozi Mukuru w’Urwego rw’Igihugu rw’Itangazamakuru, RBA, Barore Cléophas, yavuze ko abanyamakuru bishwe muri Jenoside yakorewe Abatutsi mu 1994, bahowe uko bavutse n’urwango Abatutsi bari bafitiwe.

Yagize ati: “Kuba bari ibimenywabose, kuba barakoraga ibyakundwaga ntibyabarengeye ahubwo byabaye impamvu yo guhigishwa uruhindu.”

Dan Ngabonziza, Umuyobozi w’Ishyirahamwe ry’Abanyamamakuru mu Rwanda (ARJ), yashimye Ubuyobozi bukuru bw’Igihugu cyahaye Abanyamakuru amahirwe yo kwisanzura no kubaka itangazamakuru rishingiye ku ndangagaciro z’ubunyarwanda. Icyakoze asaba Abanyamakuru kudapfusha ubusa ayo mahirwe.

Amafoto: Olivier Tuyisenge

Ba uwa mbere mu kumenya amakuru agezweho!!!