Real Madrid yegukanye igikombe cya shampiyona ya Espagne habura imikino ine nyuma yaho Girona itsinze FC Barcelona ibitego 4-2.

Ku mugoroba wo Kuri uyu wa Gatandatu tariki 04 Gicurasi 2024 nibwo Real Madrid yongeye kwandika amateka muri ruhago ya Espagne itwara LaLiga ku nshuro ya 36.

Kuri uyu wa Gatandatu umunsi wa 34 wa shampiyona wakomezaga Real Madrid yatsinze Cadiz ibitego 3-0 byatsinzwe na Brahim Diaz ku munota 51, Jude Bellingham ku munota 68 na Joselu ku munota wa 90+3.

Nyuma hakurikiye umukino wa Girona na FC Barcelona warangiye Girona itsinze FC Barcelona ibitego 4-2 bihesha Real Madrid igikombe cya shampiyona habura iminsi Ine ngo shampiyona ya 2023-2024.

Gutsinda uyu mukino Kuri Girona byatumye ibona itike yo gukina UEFA Champions League ya 2024-2025.

Real Madrid yegukanye igikombe cya shampiyona n’amanota 87 irusha Girona ya Kabiri 13 na FC Barcelona ya Gatatu amanota 14.

Real Madrid yaherukaga igikombe cya shampiyona mu mwaka w’Imikino wa 2021-2022.

Iyi kipe yo muri Espagne iracyari mu rugamba rwo guhatanira Igikombe cya UEFA Champions League ishaka igikombe cya 15, aho muri ½ yanganyije na Bayern Munchen yo mu Budage igitego 2-2 mu mukino ubanza, umukino wo kwishyura uteganyijwe ku wa Gatatu tariki 8 Gicurasi 2024 ku kibuga Santiago Bernabéu.