Abagabo babiri b’imyaka 30 na 31 y’amavuko batawe muri yombi nyuma yo gufatwa batwaye mu modoka yo mu bwoko bwa Daihatsu amabalo 40 y’imyenda ya caguwa barengejeho amashu. 

Polisi y’u Rwanda ivuga ko iyo myenda ya caguwa yinjijwe mu gihugu  mu buryo bwa magendu, yafashwe igeze mu Karere ka Gakenke ikaba yari ipakiye hagati y’amashu.

Umuvugizi wa Polisi mu Ntara y’Amajyaruguru, Superintendent of Police (SP) Jean Bosco Mwiseneza, avuga ko bafatiwe mu Kagari ka Rusagara, Umurenge wa Gakenke, mu gicuku cyo ku wa Kabiri tariki ya 29 Ukwakira, ahagana saa munani n’igice.

Yagize ati: “Iriya modoka yaje iturutse mu Karere ka Rubavu irimo abo bagabo babiri, abapolisi barayihagarika bababajije ibyo bapakiye kubera ko yari itwikiriye, bavuga ko ari amashu, ni bwo babasabye gukuraho ihema yari itwikirije basanga ya mashu bayarengeje ku mabalo 40 y’imyenda ya caguwa.”

Yavuze ko abo bagabo bakimara gufatwa bemeye ko iyo myenda ari magendu bari bavanye mu Karere ka Rubavu, bakaba bari bagiye kuyipakururira i Kigali ari na ho yari bugurishirizwe.

SP Mwiseneza yavuze kandi ko hari hashize icyumweru kimwe gusa mu Murenge wa Nemba wo muri ako Karere ka Gakenke, hafatiwe imodoka yagonze ipoto iragwa na yo yari itwaye amabalo 33 y’imyenda ya caguwa ya magendu bari batwikiriyeho amashu.

Yaboneyeho kwibutsa ko amayeri yose bagerageza guhimba binjiza ibicuruzwa mu gihugu mu buryo bwa magendu, batazabura gutahurwa ngo bafatwe ku bufatanye n’abaturage ndetse n’izindi nzego. 

Ati: “Turabagira inama rero yo kubivamo bagakora ibyemewe kuko nta kindi bazabikuramo uretse ibihombo birimo no kuba bafungwa imiryango yabo ikahazaharira.”

Itegeko ry’Umuryango w’Afurika y’Iburasirazuba (EAC) rinakoreshwa mu Rwanda, ingingo yaryo ya 199 ivuga ko ibicuruzwa bya magendu byafashwe bitezwa cyamunara.

Imodoka yakoreshejwe muri ubwo bucuruzi bwa magendu na yo itezwa cyamunara ndetse umushoferi wayo agacibwa amande angana n’ibihumbi bitanu by’amadolari y’Amerika (US$ 5000).

Ingingo ya 87 y’Itegeko No. 026/2019 ryo ku wa 18/09/2019 rigena uburyo bw’isoresha, iteganya ko umuntu wese uhamijwe n’urukiko kugambirira kutishyura umusoro ukoze igikorwa cyo guhisha ibicuruzwa bisoreshwa cyangwa imitungo ifitanye isano n’ubucuruzi; ahanishwa igifungo kitari munsi y’imyaka ibiri (2) ariko kitarengeje imyaka itanu (5).