Gasogi United yatsinze Kiyovu Sports ifata umwanya wa kabiri muri Shampiyona
Gasogi United yatsinze Kiyovu Sports igitego 1-0 mu mukino wabimburiye indi y’umunsi wa munani wa Shampiyona, ifata umwanya wa kabiri ku rutonde rw’agateganyo rwa shampiyona.
Uyu mukino wabereye kuri Stade Amahoro ku mugoroba wo kuri uyu wa Gatanu, tariki ya 21 Ugushyingo 2025.
Wari umukino watangiye utuje ku mpande zombi n’uburyo bw’ibitego ari buke.
Ku munota wa 35, Sharif Bayo yateye umupira mu izamu myugariro wa Gasogi awukuramo, abakinnyi ba Kiyovu bakeka ko yawukoze bityo ari penaliti ariko umusifuzi Uwikunda Samuel avuga ko nta cyabaye.
Mbere y’uko igice cya mbere kirangira umusifuzi wa kane yongeyeho iminota ine y’inyongera
Ku munota wa 45+2 Gasogi United yafunguye amazamu ku mupira Hakimi Hamissi yahinduye imbere y’izamu usanga Kokoeto Udo awukina n’umutwe, umunyezamu James awukuramo ariko Faizo Kazibwe wari wenyine awusonga mu izamu.
Igice cya mbere cyarangiye Gasogi United yatsinze Kiyovu Sports igitego 1-0.
Mu igice cya kabiri, Kiyovu Sports yagarukanye imbaraga itangira gusatira izamu rya Gasogi United ishaka igitego cyo kwishyura.
Ku munota wa 60, Amissi Cédric, yazamukanye umupira neza awucomekera Niyo David ateye ishoti umunyezamu Ndagijimana Leandre awukuramo.
Kiyovu Sports yari mu mukino yongeye kubona amahirwe imbere y’izamu ku mupira Moise Sandja yacomekewe umupira mwiza azamuka yihuta ageze mu rubuga rw’amahina yitegura gutera ishoti, myugariro Hakizimana Adolphe araserebeka awumukura ku kirenge neza cyane.
Ku rundi ruhande Gasogi United yugarira cyane ngo itishyurwa igitego cyayo.
Ku munota wa 83, Uwineza Rene yazamutse yihuta acenga myugariro wa Gasogi aragwa ahindura umupira imbere y’izamu usanga Gabriel Fils Ndong akina n’umutwe ukubita umutambiko uvamo.
Umukino warangiye Gasogi United yatsinze Kiyovu Sports igitego 1-0, ifata umwanya wa kabiri ku rutonde rw’agateganyo rwa shampiyona n’amanota 15 irushanwa na Police FC ya mbere amanota abiri.
Ni mu gihe Kiyovu Sports yagumye ku mwanya wa karindwi n’amanota 10.
Indi mikino y’umunsi wa munani wa Shampiyona izakinwa ku wa Gatandatu, tariki ya 22 Ugushyingo 2025
Police FC izakina na Gicumbi saa cyenda,
Marines FC izakina na Gorilla FC saa cyenda,
Amagaju FC azakina na Etincelles FC saa cyenda,
Musanze FC izakina na APR FC saa cyenda,
Bugesera FC ihure na Rutsiro FC saa cyenda.
TANGA IGITECYEREZO
AMATEGEKO AGENGA IYANDIKA RY'IGITEKEREZO CYAWE
IZINDI NKURU WASOMA
