Umugaba Mukuru w’Ingabo z’u Rwanda, Gen. Mubarakh Muganga, yagiranye ibiganiro na mugenzi we w’Ingabo za Santarafurika, Gen. Zéphirin Mamadou, byibanze ku buryo bwo kurushaho gushimangira ubufatanye busanzweho mu bya gisirikare hagati y’ibihugu byombi. 

Ibi biganiro byabereye ku Cyicaro Gikuru cy’Ingabo z’u Rwanda (RDF) ku Kimihurura, ku wa Kabiri tariki ya 3 Ugushyingo 2026, mbere yo guhura na Minisitiri w’Ingabo Juvenal Marizamunda.

Minisiteri y’Ingabo mu Rwanda yatangaje ko abayobozi bombi bagiranye ibiganiro byibanze ku kurebera hamwe uburyo bwo kurushaho gushimangira umubano n’ubufatanye bisanzweho, hibandwa by’umwihariko ku mahugurwa ya gisirikare, ubufatanye mu bikorwa bya gisirikare ndetse no gushyira mu bikorwa amasezerano impande zombi zasinyanye.

Muri uru ruzinduko, Gen. Mamadou ari kumwe na mugenzi we w’u Rwanda, Gen. Mubarakh Muganga bitabiriye umuhango wo gusoza amahugurwa y’ibanze y’ibikorwa bya gisirikare bidasanzwe yitabiriwe n’abasirikare 254 ba Repubulika ya Santarafurika mu Kigo cy’Amahugurwa ya gisirikare cya Nasho, mu Karere ka Kirehe.

Uru ruzinduko rushimangira ubushake bw’u Rwanda na Repubulika ya Santarafurika bwo gukomeza kwimakaza ubufatanye mu bya gisirikare, binyuze mu biganiro bihoraho, kongerera ubushobozi ingabo no gufatanya mu zindi nzego zifitiye impande zombi inyungu.

Ba uwa mbere mu kumenya amakuru agezweho!!!