Abatuye Umujyi wa Goma mu Ntara ya Kivu y’Amajyaruguru muri Teritwari ya Nyiragongo, barishimira ko bizihije iminsi mikuru bafite umutekano bahawe n’ubuyobozi bw’Ihuriro AFC/M23. Ni mu gihe habura iminsi itageze kuri 30 umwaka ngo wuzure, umutwe wa M23 ugenzura ibice binini mu ntara ya Kivu y’Amajyaruguru.

Bamwe mu banyekongo bagaragaye kuri Hoteli Serena mu Mujyi wa Goma bari kumwe na Guverineri wa Kivu y’Amajyaruguru, Bahati Musanga Joseph n’abandi banyacyubahiro bo mu Ihuriro AFC/M23.

Bari mu birori byo kwishimira umwaka mushya wa 2026 ndetse haraswa ibishashi mu rwego rwo kwishimira ko binjiye mu wundi mwaka.

Abanyekongo baganiriye na Imvaho Nshya bavuga ko bishimira ko iminsi mikuru irimo kugenda neza kandi ko n’abacuruzi barimo kubona abakiliya.

Sudi yagize ati: “Ikilo cy’inyama ya file ni amadolari 10 (14 500 Frw), ikilo cy’inyama y’ikinono ni amadolari 5 (7 250 Frw), ikilo cy’inyama y’iroti ni amadolari 6 (8 700 Frw) naho ikilo cy’inyama zo mu nda ni amadolari 5.”

François ukora akazi ko gutwara abagenzi kuri moto mu Mujyi wa Goma, yifuriza umwaka mushya muhire bagenzi be b’Abanyekongo.

Ati: “Ahantu hose bari, Abakongomani bose bumve yuko AFC/M23 yageze muri Goma ije kutubohora, kutuvana mu buyobozi bubi. Turashimira mbere na mbere Guverineri wacu, Bahati Erasto Musanga, yaje muri Goma asanga abamotari byari byarazambye cyane.”

Mugenzi we na we utwara abagenzi mu Mujyi wa Goma agira ati: “Mbere na mbere turashimira Imana, kubera ko ubu ibintu bimeze neza, tugereranyije n’uko byari bimeze mu myaka yashize hakiri ingabo za FRDC na Wazalendo. Ubu turashimira Imana kuko dufite amahoro mu Mujyi wacu wa Goma.”

Jimmy utwara abagenzi mu modoka nto zizwi nka ‘Taxi Voiture’ yahamirije Imvaho Nshya ko bishimye kandi ko bimeze neza agereranyije n’uko mbere byari byifashe. Avuga ko bakora amanywa n’ijoro mu gihe mbere ari ibintu bitashobokaga.

Abacuruzi mu Mujyi wa Goma bagaragaza ko bafite ikibazo cyo kutabona amafaranga kuko amafaranga akoreshwa, ari azenguruka mu baturage gusa kubera ikibazo cy’amabanki adakora ndetse n’ikibuga cy’indege kidakora kugira ngo bashobore no kwakira amadovise.

Manzi Ngarambe Willy, Visi Guverineri ushinzwe ibijyanye na politiki, ubuyobozi n’amategeko, yatangaje ko ku nshuro ya mbere mu myaka myinshi ishize, Umujyi wa Goma warangije umwaka umwe ugatangira undi nta rusaku rw’amasasu, nta bwicanyi, nta ruswa, nta gufata ku ngufu, kandi nta kavuyo.

Akomeza agira ati: “Ibiciro by’ibicuruzwa biri ku rwego ruto cyane bitigeze bigeraho, umutekano waragarutse, kandi imiryango yongeye kubaho, gukora no kugenda mu bwisanzure. Ibi byagezweho bitewe n’imbaraga za AFC/M23.”

Kuri we avuga ko iki gihe kigaragaza intangiriro yo gusobanukirwa icyo icyubahiro gisobanura ku Munyekongo uba mu gace kabohowe nko kugira uburenganzira bwo kubaho mu mutekano, kubona ubutabera no kubahwa.

Mu bitangaza benshi, Visi Guverineri Manzi Ngarambe yerekana ko AFC/M23 ikomeje kugaragaza ko bishoboka kurinda abaturage byuzuye, gushyira abasivili imbere no gusubiza ubutabera mu murongo.

Ati: “AFC/M23 yerekanye ko igisirikare gishobora kurinda abaturage aho kubasahura, ko imyitwarire myiza ishobora gusimbura ihohoterwa, kandi ko imiryango ishobora kubaho idafite ubwoba.

Mu bice byabohowe, amoko yose abanye mu mahoro n’ubwumvikane, bigaragaza ko kubana mu mahoro atari inzozi ahubwo ari ukuri iyo ubutabera, umutekano n’icyubahiro byubahirijwe.”

Amafoto & Video: Olivier Tuyisenge

Ba uwa mbere mu kumenya amakuru agezweho!!!