Tunisia 24-22 Angola

Misiri 35-15 Algeria

Ikipe ya Misiri yegukanye igikombe cy’Afurika mu batarengeje imyaka 20 mu mukino wa Handball nyuma yo gutsinda ku mukino wa nyuma  ikipe ya Algeria  ibitego 35 kuri 15.

Iri rushanwa ry’Afurika “U-20 African Men’s Handball Championship Rwanda 2022” ryabereye mu Rwanda kuva taliki 20 risozwa 27 Kanama 2022. Ikipe ya Misiri yisubije iki gikombe yaherukaga gutwara muri 2018 itsinze ikipe ya Algeria ibitego 35 kuri 15.

Iyi kipe ya Misiri yari yageze ku mukino wa nyuma itsinze ikipe ya  Angola muri ½ ku bitego 33 kuri 22 naho ikipe ya Algeria ikaba yari yasezereye  ikipe ya Tunisia ku bitego 29 kuri 25.

Ikipe ya Tunisia yegukanye umwanya wa gatatu itsinze ikipe ya Angola ibitego 24 kuri 22.

Uko amakipe yakurikiranye

Iri rushanwa ryari ryitabiriwe n’amakipe 8 aho yashyizwe mu matsinda abiri,  itsinda A ryari rigizwe n’u Rwanda, Tunisia, Maroc na Angola naho itsinda B rigizwe na Misiri, Algeria, Congo Brazzaville na Libya.

Nyuma y’imikino y’amajonjora ndetse n’imikino ya nyuma yabereye muri BK Arena, ikipe ya Misiri yasoreje ku mwanya wa mbere,ikurikirwa na Algeria, Tunisia (3), Angola (4),  Maroc (5), Libiya (6), Congo Brazzaville (7) n’u Rwanda (8).

Amakipe 4  ya mbere, Misiri, Algeria, Tunisia  na Angola ni yo azahagararira Afurika mu mikino y’igikombe cy’Isi “IHF Men’s Junior World  Handball Championship 2023” izabera mu Budage no mu Bugereki.

Nyuma y’iyi mikino y’Afurika mu batarengeje imyaka 20 hazakurikiraho imikino y’Afurika mu batarengeje imyaka 18 izaba ibaye ku nshuro ya 18  “U-18 African Men’s Handball Championship Rwanda 2022”. Imikino izatangira taliki 30 Kanama  isozwe taliki 06 Nzeri 2022.

Amafoto yaranze umunsi wa nyuma

Ba uwa mbere mu kumenya amakuru agezweho!!!