Ikipe y’Igihugu y’u Rwanda ya Handball yatsinzwe n’iya Algeria ibitego 46-25 mu mukino wa kabiri wo mu itsinda rya mbere mu mu Gikombe cya Afurika kiri kubera i Kigali.

Ni mu mukino wabereye muri BK Arena mu ijoro ryo kuri uyu wa Kane, tariki ya 22 Mutarama 2026.

U Rwanda rwari rwatangiye irushanwa rutsinda Zambia rwasabwaga gutsinda rukabona itike ya 1/4 mu gihe Algeria yatsinzwe na Nigeria yifuza gutsinda ikiyongera amahirwe yo kurenga amatsinda.

Ikipe y’igihugu ya Algeria yitwaye neza mu minota 10 ya mbere irangira ifite ibitego 9-3.

Abakinnyi ngenderwaho nka Mbesutunguwe Samuel na Kayijamahe Yves wabonaga bizwe cyane ku buryo kureba mu izamu byabanje kubagora.

Algeria yarushaga cyane u Rwanda yakomeje kugenda imbere n’ibitego by’ikinyuranyo bikomeza kuzamuka kugeza igice cya mbere kirangiye ari ibitego 23 ku 10.

Mu igice cya kabiri, Kayijamahe Yves yahanwe inshuro ebyiri, ahabwa iminota ibiri kubera amakosa yakoreye Abanya- Algeria ndetse nta gitego aratsinda.

Umukino warangiye u Rwanda rutsinzwe na Algeria ibitego 46-25, rutakaza umukino wa mbere mu Gikombe cya Afurika.

Muri uyu mukino, Kubwimana Emmanuel ni we watsinze byinshi umunani, abinganya na Guemaida na Daoud ba Algeria.

Ikipe y’u Rwanda izasubira mu kibuga ku wa Gatandatu, tariki ya 24 Mutarama, aho izakina na Nigeria mu mukino usoza iyo mu Itsinda A uzatangira saa moya z’umugoroba.

Undi mukino wabaye muri iri tsinda, Nigeria yatsinze Zambia ibitego 36-18, yuzuza umukino wikurikiranya itsinda ndetse yizera kurenga amatsinda.

Indi mikino yabaye, Gabon yatsinze Uganda ibitego 33-16 naho Misiri itsinda Angola 41-28 mu itsinda B, Cameroun yatsinze Kenya 28-24, Tunisia itsinda Guinea 35-25.

Mu itsinda C, Cap-Vert yatsinze Maroc 33-28 mu gihe  Congo Brazzaville yatsinze Benin ibitego 26-22 mu Itsinda D.

Ba uwa mbere mu kumenya amakuru agezweho!!!