Inama yahuje ihuriro ry’inganda zitunganya umuceri mu Rwanda (RFRMI) n’impuzamahuriro y’amakoperative y’abahinzi b’umuceri mu Rwanda (FUCORIRWA) yanzuye ko umuhinzi w’umuceri azagurirwa umusaruro we w’igihembwe cy’ihinga A 2026 ku giciro cyagenwe n’impande zombi kandi bikamenyeshwa Minisitiri y’Ubucuruzi n’Inganda (MINICOM).

Impande zombi zemeranyijwe ku biciro inganda zemewe zizaguriraho abahinzi. Imyanzuro y’inama yemeza ibiciro ku igurisha ry’umuceri Imvaho Nshya ifitiye kopi, igaragaza ibiciro by’umuceri umuhinzi azishyurirwaho.

Iyo nyandiko igira iti: “Igiciro cy’umuceri mugufi ni 540 Frw ku kilo, igiciro cy’umuceri wo hagati ni 545 Frw ku kilo, igiciro cy’umuceri muremure ni 550 Frw ku kilo mu gihe igiciro cy’umuceri wa Basmati ari 720 Frw ku kilo.”

Abahinzi bazatonorerwa umuceri wo kurya uhuye n’ubwoko koperative yagemuye (mugufi, uringaniye, umuremure na Basmati) mbere yo gutonora uwo kugurisha no gupfunyika uwo muceri mu mifuka itari iy’ubucuruzi.

Inganda zisabwa gukomeza gukorana neza n’amakoperative ziyafasha kongera umusaruro mu bwiza no mu bwinshi ndetse no kwishyura koperative mbere yo gutwara umuceri.

Mu rwego rwo kwirinda abamamyi, amakoperative asabwa gukorana neza n’inganda basanganywe mu gihe bafitanye imikoranire myiza.

Muri gahunda y’Igihugu yo kwihutisha Iterambere (NST2) Guverinoma y’u Rwanda yagaragaje ko bitarenze mu 2029 umusaruro w’ubuhinzi n’ubworozi uzongerwa ku kigero cya 50% mu rwego rwo gukomeza kwihaza mu biribwa n’iterambere ry’ubukungu bw’igihugu, inagaragaza ibizarufasha.

Mu rwego rw’ubuhinzi, hazazamurwa ikigero cyo kwihaza mu biribwa mu buryo burambye. Kizava kuri 79,6% mu 2024 kikagera ku 100% muri 2029.

Mu 2024 ubuhinzi bwari bugize 25% by’umusaruro mbumbe w’igihugu hakaba hifuzwa ko uwo musaruro wongerwaho 50% mu 2029.

Ni mu gihe agaciro k’ibyatunganyirijwe mu nganda bikomoka ku buhinzi n’ubworozi, kavuye kuri 369Frw mu 2017, kagera kuri Miliyari 1000 Frw mu 2024.

Ubuhinzi kandi butanga akazi ku kigero cya 55% mu bice by’icyaro na 12% mu Mijyi mu gihe abahinga bagamije isoko mu 2025 bari ku kigero cya 48% mu gihe hafi 70% y’Abanyarwanda batunzwe nabwo.

Ba uwa mbere mu kumenya amakuru agezweho!!!