Iburengerazuba: RRA yahembye abasora 9 babaye indashyikirwa
Ubukungu

Iburengerazuba: RRA yahembye abasora 9 babaye indashyikirwa

Imvaho Nshya

October 21, 2023

Ikigo cy’Imisoro n’Amahoro RRA cyahembye abasora 9 bo mu Ntara y’Iburengerazuba kubera guhiga abandi mu bikorwa bitandukanye bifitanye isano no gusora neza muri iyo Ntara, ndetse abasora bose bahabwa ubutumwa bwo kurushaho kugaragaza ibyo boroherejwemo kugira ngo basore neza.

Ni kuri uyu wa 20 Ukwakira, mu gikorwa cyabereye mu Karere ka Nyamasheke ku nsanganyamatsiko igira iti ‘Saba Fagitire ya EBM wubake u Rwanda’

Mu ijambo rirambuye rya Komiseri Mukuru w’Ikigo cy’Imisoro n’Amahoro,  Ruganintwali Pascal yagejeje ku bitabiriye uyu munsi, yashimiye abasora uruhare rwabo rw’indashyikirwa mu kubaka igihugu, anagaragaza impinduka zabayeho muri iki kigo zigamije kunoza serivisi no kugabanya imisoro kugira ngo abasora babikore bishimye, banarusheho kwinjiza myinshi na serivisi habawa zinoge.

Yavuze ko byakozwe na Guverinoma bisabwe n’umukuru w’igihugu wababwiye ko yumva abaturage binubira imosoro ihanitse, anavuga ko habayeho impinduka nyinshi haba mu miyiborere y’ikigo ubwacyo,  amategeko ajyanye no gusoresha, n’imisoro nyirizina.

Ati: “Mu mavugurura twakoze, twarebye mbere na mbere icyakorwa ngo imikorere yacu inoge kuko tuzi ko n’uyu munsi abasora binubira imikorere y’ikigo cy’imisoro n’amahoro.

Twasanze ari ngombwa ko harebwa icyakorwa ngo ikigo kivugururwe mu mikorere, tugambiriye cyane cyane kunoza serivisi no guhindura imyitwarire n’imikorere rusange y’abakozi.”

Yabijeje ko ubu hari imisoro myishi yagabanyijwe n’iyakuweho mu rwego rwo korohereza abaturage, abibutsa ariko ko imisoro ari yo yubaka igihugu, asaba abasora kubikora neza, banazirikana ko Guverinoma ikora ibishoboka byose ngo ibyo bagaragaza ko bibabangamiye bikurweho basore bishimye, banarusheho gusora neza.

Abashimiwe mu gusora neza mu Ntara y’Iburengerazuba  bari mu byiciro 3, birimo abasora 7 b’indashyikirwa,umwe muri buri karere aho uwabaye uwa mbere yabishimiwe ariko akazahembwa no ku rwego rw’igihugu.

Icyiciro cya 2 cyagaragayemo usora witwaye neza mu gutanga umusoro w’inzego z’ibanze, cyane cyane uwo ku bukode bw’umutungo utimukanwa.

Icyiciro cya 3 kizamo uwashoboye gutanga inyemezabuguzi nyinshi umwaka ushize w’isoresha, n’umuguzi washoboye kubahiriza insangamatsiko y’uyu mwaka, agasaba inyemezabuguzi nyinshi igihe cyose agize icyo agura, akaba atari umucuruzi.

Nyuma y’ibi bihembo abaganiriye n’Imvaho Nshya, bishimiye kuba ibyo bakoze byarahawe agaciro, bizeza kuzarushaho uyu mwaka, banasaba bagenzi babo batagaragaye mu ndashyikirwa kubiharanira, cyane cyane ko muri bose ntawe uyobewe akamaro ko gusora neza.

Uruganda rw’icyayi rwa Pfunda rwo mu Karere ka Rubavu ni rwo rwabahize bose, aho rwinjije mu isanduku ya Leta amafaranga y’u Rwanda 1.342.112.721.

Ku mwanya wa kabiri haje uruganda rw’icyayi rwa Shagasha, ruri mu Karere ka Rusizi, rwaje ku mwanya wa 2 rwasoze amafaranga y’u Rwanda 519.508.422.

Rugamba Innocent, umuyobozi wungirije w’uruganda rw’icyayi rwa Shagasha yatangarije Imvaho Nshya ko yishimiye ko ibikorwa byabo byo gusora neza bibonwa n’inzego zibakuriye.

Ati: “Biradushimishije cyane. Ni igihembo cy’abahinzi bacu b’icyayi nshimira cyane, kuko batabigizemo uruhare ngo bahinge icyayi neza ibi ntibyagerwaho. Biragaragara ko ibyo dukora igihugu kibibona, binafite agaciro.

Tuzakomeza guharanira ubudashyikirwa mu gusora neza kuko tudasoze ntacyo twaba turi cyo. Ibi byose tubona igihugu cyacu tugeraho ni imisoro, ni yo mpamvu tuzaharanira gukomeza kucyubaka dusora neza”.

Ntabahejeje Thèogène wo mu Karere ka Nyabihu, wahembwe nk’umuntu ku giti cye wabaye indashyikirwa mu gusora neza, winjirije igihugu amafaranga y’u Rwanda 47.207309.

Yagize ati: “Ntanga umusanzu neza kuko mba nzi ko  uzangarukira, iyo ukoreshejwe umuhanda tunyuramo, cyangwa ibindi bikorwa bya Leta by’ingirakamaro, nanjye mba nungutse.

Ni yo mpamvu nkoresha EBM neza, nkanabishishikariza n’abandi kuko ari byiza cyane, nkanasanga abatayikoresha ari ubushake buke, bisubireho”.

Gatango Félix wo mu Murenge wa Karambi, Akarere ka Nyamasheke wiga ubuhinzi n’ubworozi muri kaminuza mu Karere ka Musanze, wahembwe nk’umuguzi watse EBM ku cyo aguze cyose, agasabwa kubera abandi baguzi urugero, yavuze ko yishimye, kuko atari azi ko ibyo akora bibonwa.

Ati: “Biranshimishije cyane. Ndagira inama n’abandi kujya baka EBM uko bagize icyo bagura. Uyibimye bakajya ahandi ariko uwo musoro bashakaga kunyereza ukinjira tukiyubakira igihugu”.

Guverineri w’Intara y’Iburengerazuba, Dushimimana Lambert, yavuze ko gushimira abasora ari ngombwa.

Ati’’ Gushimira abasora ni ngombwa kugira ngo uwakoze neza abishimirwe, n’uwakoze nabi yikubite agashyi yumve ko iyo adasora aba ateza igihombo kuri buri Munyarwanda wese.’’

Intara y’Iburengerazuba igizwe n’abasora 57.679, bibukijwe gukoresha EBM neza, kuko kuva aho itangiye gukoresherezwa muri 2013, byagize akamaro cyane umusoro ku nyongeragaciro (TVA) wikubye inshuro 3.

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA