Urwego rw’u Rwanda rushinzwe Igorora (RCS), rwatangaje ko Igororero rya Bugesera ryafunzwe ndetse rwemeza ko abagororwa bimuriwe mu yandi Magororero.

Bikubiye mu itangazo ryatangajwe n’Urwego rw’u Rwanda rushinzwe igorora (RCS), kuri uyu wa Mbere tariki ya 12 Ukwakira 2026.

Mu itangazo ryashyizweho umukono n’umuvugizi wa RCS, CSUPT Hillary Sengabo ryashyizwe ahagaragara bagize bati: “Iryo Gororero ryafunzwe guhera uyu munsi, bityo mukaba mu menyeshejwe ko abari baririmo bimuriwe mu yandi Magororero.”

RCS yamenyesheje ko abagororwa bashyiriweho uburyo bwo kuvugana n’abo mu miryango yabo aho bimuriwe naho bazajya bajya kubasura.

Minisitiri w’Umutekano mu Gihugu Dr Vincent Biruta yigeze gutangaza ko iri Gororero ryimuwe muri gahunda iteganyijwe yo kwimura amagororero ari mu mijyi arimo irya Musanze, Muhanga, Ngoma, Huye n’irya Bugesera kubera Ikibuga cy’Indege Mpuzamahanga cya Kigali kiri kubakwa hafi yaryo.

Iyi gahunda yatangajwe na Minisitiri w’Umutekano mu Gihugu, Dr Biruta Vincent kuwa 13 Werurwe 2026 aho yashimangiye ko kwimura aya magororero bishingiye ku kuba aho ari atabasha kubahiriza ibisabwa by’ibanze ku bahagororerwa kandi ko namara kwimurwa hazakurikizwa igishushanyo mbonera cyo kuyubaka mu buryo bugezweho kandi bwisanzuye.

Dr Biruta yavuze ko ibyo bigamije kunoza uburyo bw’imyubakire y’ayo magororero ku buryo bizafasha abagororwa kubaho bisanzuye kandi batekanye.

Yagize ati: “Muri uko kuyimura hazakurikizwa igishushanyo mbonera ku buryo hazakurikizwa uburyo igororero rigomba kuba ryubatse, ku buryo andi azubakwa mu gihe kiri imbere azaba yujuje ibyangombwa biyateganywamo.”

Minisiteri y’Umutekano mu gihugu itangaza ko kugeza ubu mu Rwanda ubucucike mu magororera bugeze kuri 97,7% ariko hamwe bukaba bwiyongera kubera ko hari abayajyanwamo mu buryo budasanzwe nko mu gihe bari muri za kasho z’urukiko no mu magororero asanzwe.

Imibare ya Komisiyo y’Igihugu y’Uburenganzira bwa Muntu (NCHR), yo mu Kwakira 2025, yagaragaje ko mu mwaka wa 2024/2025 ubucucike bwo bwo mu Magororero bwari bugeze ku 110%.

Ni imibare iyo Komisiyo yakuye mu igenzura ry’iyubahirizwa ry’uburenganzira bwa muntu mu magororero 14, mu ngando icumbikiye abagororwa bakora igihano cy’imirimo y’inyungu rusange mu Karere ka Rwamagana.

Ba uwa mbere mu kumenya amakuru agezweho!!!