Itsinda ry’Abagize Inteko Ishinga Amategeko ya Namibia ririmo kugirira uruzinduko rw’akazi mu Rwanda, aho bari mu rugendoshuri rugamije kwigira ku byiza u Rwanda rumaze kugeraho ndetse na politike y’Igorora.

Ni itsinda ryakiriwe na CG Evariste Murenzi, Komiseri Mukuru w’Urwego rw’u Rwanda rushinzwe Igorora (RCS), ku Cyicaro Gikuru cya RCS kuri uyu wa Gatatu tariki ya 28 Mutarama 2026.

Hon. James Uerikua, uhagarariye Komite Ihoraho y’Inteko Ishinga Amategeko ishinzwe kurinda umutekano, umubano mpuzamahanga no kurinda umutekano w’Inteko Ishinga Amategeko mu Gihugu cya Namibia, yagiranye ibiganiro na CG Murenzi ku ngingo zirimo imikorere n’imikoranire mu by’igorora.

Ibiganiro byabo byarimo abayobozi bakuru muri RCS ndetse binitabirwa na Hon. Aime Marie Ange Tumukunde mu Nteko Ishinga Amategoko y’u Rwanda.

Basobanuriwe amateka atandukanye ya RCS aho basobanuriwe uburyo yavuye muri politike yo gufunga ikajjya muri politike yo kugorora, aho yibanda ku guha ubumenyi butandukanye umugororwa.

Bagaragarijwe ibikorwa bitandukanye RCS ikora by’igorora  bigamije kubahiriza uberenganzira bwa muntu, uburyo butandukanye umugororwa ahabwamo ubumenyi bumufasha kuzasubira mu muryango yarahindutse umuturage muzima, kandi ushoboye kwibeshaho ubwe n’abamukomokaho binyuze mu myuga bigira mu magororero.

Abadepite mu Nteko Ishinga Amategeko ya Namibia bari mu ruzinduko mu Rwanda, kuva ku wa 24 Mutarama 2026, aho bari gusura inzego n’ibigo bitandukanye mu Rwanda bagamije kongera ubumenyi, kumenya amateka no gusangira ubunararibonye mu bikorwa bitandukanye ku bihugu byombi.

Biteganyijwe ko uruzinduko rwabo mu Rwanda ruzarangira tariki ya 31 Mutarama 2026.

CG Murenzi yashimiye abashyitsi basuye RCS, anashimira umubano mwiza Repubulika ya Namibia ifitanye n’u Rwanda abasaba ko uyu mubano wakomeza kandi ugatera imbere.

Hon. James wari uhagariye iri tsinda yavuze ko bishimiye aho u Rwanda rumaze kugera nyuma ya Jenoside yakorewe Abatutsi 1994, ndetse ashimira by’umwihariko Urwego rw’u Rwanda rushinzwe Igorora ku ntabwe rwagezeho mu bikorwa by’indashyikirwa by’igorora biteza imbere abagororwa n’Igihugu muri rusange.

Yagize ati: “Twize ibintu byinshi. Twaje mu Rwanda kureba ibikorwa by’igorora by’umwihariko uburyo bavuye kuri politike yo gufunga bakajya muri gahunda y’igorora. Twaje kureba uburyo uwakoze icyaha afatwa akagezwa imbere y’ubutabera agakora igihano akagororwa, akazavamo umuturage mwiza.”

Yashimye intambwe RCS igezeho mu kubahiriza no kwita ku mugorwa yemeza ko bazabigiraho byinshi anasaba ko nabo bazaza gusura igihugu cyabo cya Namibia.

Uru ruzinduko ruje nyuma y’aho Urwego rw’u Rwanda rushinzwe Igorora, RCS n’Urwego rushinzwe Igorora muri Namibia bisinyanye amaserano y’ubufanye, yashyizweho umukono ku wa 25 Ugushyingo 2025.

Ni amasezerano yashyizweho umukono na Komiseri Mukuru wa RCS, CG Evariste Murenzi na CG Raphael T. Humunyela Komiseri Mukuru w’Igorora muri Namibia.

Umubano w’u Rwanda na Namibia mu bya dipolomasi watangiye mu mwaka wa 1990, ndetse ugenda wagukira mu nzego zitandukanye zirimo n’umutekano hagati y’inzego zishinzwe kubahiriza amategeko z’Ibihugu byombi.

By’umwihariko guhera mu 2015, Polisi y’u Rwanda n’iya Namibia zasinyanye amasezerano y’ubufatanye cyane cyane mu bijyanye n’amahugurwa. Kugeza mu 2022, abapolisi bakuru 15 ba Namibia bari bamaze gusoza amasomo ya ba Ofisiye bakuru mu ishuri rikuru rya Polisi y’u Rwanda.

Uretse mu bijyanye n’umutekano, u Rwanda na Namibia bifitanye n’amasezerano y’ubufatanye mu gusangira ikirere cy’ibihugu byombi, agamije kurushaho kwimakaza ubucuruzi n’iterambere ry’ubukerarugendo no kwakira abantu.

Ba uwa mbere mu kumenya amakuru agezweho!!!