Ubuyobozi bw’Umujyi wa Kigali bwafunguriye inyubako eshanu zari zahagaritswe gukorerwamo ibikorwa bitandukanye kubera kutuzuza ibisabwa mu gukumira inkongi z’umuriro, nyuma yo gukosora ibibazo byari byagaragajwe n’ubugenzuzi.

Mu itangazo ryashyizwe ahagaragara ku wa Gatanu, tariki ya 13 Ugushyingo 2026, Umujyi wa Kigali watangaje ko izi nyubako zemerewe gusubukura ibikorwa byari bizikorerwamo guhera kuri uwo munsi.

Inyubako zafunguwe ni Catchup Building, Isoko rya Gahoromani riri i Masaka, Real Contractors Workshop i Gikondo, Ntaganzwa House na Eden Tower zo mu Karere ka Nyarugenge.

Umujyi wa Kigali wavuze ko izo nyubako zafunguwe nyuma yo kuzuza ibisabwa mu kwirinda inkongi z’umuriro, wari waragaragaje ko bitubahirizwa mu bugenzuzi bwakozwe.

Itangazo ryagize riti: “Ubuyobozi bw’Umujyi wa Kigali buramenyesha abantu bose ko izi nyubako eshanu zari zafunzwe kubera kutubahiriza ibisabwa mu kwirinda inkongi ubu zafunguwe guhera uyu munsi tariki 13 Ugushyingo 2026.”

Ubuyobozi bw’Umujyi wa Kigali bwasabye ba nyir’izindi nyubako zitarafungurirwa kwihutisha ishyirwa mu bikorwa ry’ibisabwa kugira ngo na zo zemererwe kongera gukora.

Mu byo basabwe harimo gukosora ibibazo byagaragajwe mu igenzura, gushyira mu bikorwa ingamba zo kwirinda inkongi no kubahiriza ibisabwa mu bijyanye no gucunga amazi yanduye.

Itangazo rikomeza rigira riti: “Ubuyobozi bw’Umujyi wa Kigali burasaba abasigaye batarafungurirwa ko na bo bakwihutisha ishyirwa mu bikorwa ry’ibisabwa mu kwirinda inkongi no gufata amazi yanduye.”

Umujyi wa Kigali wibukije ba nyir’inyubako n’abazicunga ko bafite inshingano zo guhora bazibungabunga, bagenzura ko ibikoresho n’uburyo bwo gukumira inkongi bihari kandi bikora neza.

Ibyo birimo kugira ibikoresho bizimya umuriro, uburyo bwo gutahura inkongi hakiri kare, inzira z’ubutabazi n’aho abantu banyura basohoka mu nyubako igihe habaye impanuka.

Ni igice cy’ubugenzuzi bukomeje gukorwa

Gufungura izi nyubako ni indi ntambwe mu bugenzuzi Umujyi wa Kigali umaze igihe ukora ku nyubako z’ubucuruzi n’izindi zikoreshwamo ibikorwa bitandukanye, hagamijwe kureba niba zujuje ibisabwa mu gukumira inkongi.

Mu mpera z’Ukwakira 2026, Umujyi wa Kigali wari watangaje ko inyubako eshanu zirimo Agakiriro ka Kabuga, Umukindo na Comejoga byo ku Gisozi, ASMMS Ltd i Kicukiro n’Isoko rya Gahoromani zizafungwa by’agateganyo kubera kutuzuza ibisabwa mu kwirinda inkongi.

Ku wa 4 Ugushyingo 2026, watangaje ko izindi nyubako n’ibikorwa by’ubucuruzi 10 na byo bigiye gufungwa, zirimo Catchup Building, Agakiriro ka Gatenga, Agakiriro ka Gahanga, Rwanda Foam Showroom, KAL Plaza, N&B Plaza, Eden Tower, Matheus House, Ntaganzwa House na Ndaru Arcade.

Icyo gihe Umujyi wa Kigali wasobanuye ko inyubako zizemererwa kongera gukora ari izizaba zakemuye ibibazo byagaragajwe n’ubugenzuzi, zikongera kugenzurwa zikemezwa ko zujuje ibisabwa.

Izi ngamba zigamije kurinda ubuzima bw’abakora muri izo nyubako, abazisura n’abahakorera ubucuruzi, ndetse no kurengera imitungo yabo ishobora kwangizwa n’inkongi.

Umujyi wa Kigali usaba ba nyir’inyubako n’abazicunga kudategereza ko habaho ubugenzuzi cyangwa impanuka kugira ngo bashyire mu bikorwa amabwiriza y’umutekano, ahubwo bakabigira inshingano zihoraho.

Ba uwa mbere mu kumenya amakuru agezweho!!!