Ingabo z’u Rwanda na Polisi y’Igihugu batangije ibikorwa bigamije guteza imbere imibereho myiza y’abaturage. Ni ibikorwa byayobowe na bamwe mu bagize Guverinoma, Umugaba Mukuru w’ingabo z’u Rwanda (RDF), Gen. Mubarakh Muganga n’Umuyobozi Mukuru wa Polisi y’u Rwanda (RNP), CG Felix Namuhoranye.

Ibikorwa bifite insanganyamatsiko igira iti “Ubufatanye bw’Abaturage, Ingabo na Polisi by’u Rwanda mu bikorwa byo kwizihiza Kwibohora32.”

Ingabo z’u Rwanda na Polisi y’Igihugu zizafatanya n’abaturage kububakira ibikorwa remezo bitandukanye, mu rwego rwo kwizihiza ku nshuro ya 32 Umunsi wo Kwibohora.

Ibikorwa byatangijwe hirya no hino mu gihugu kuri uyu wa Mbere tariki 09 Werurwe 2026. Minisitiri w’Umutekano mu Gihugu, Dr. Vincent Biruta, yabwiye abaturage bo mu Karere ka Nyagatare mu Murenge wa Rwempasha ko ibikorwa bihuriweho n’Ingabo na Polisi y’Igihugu bigamije guteza imbere imibereho n’iterambere by’abaturage.

Ni ibikorwa biri mu rwego rwo Kwibohora, bikazibanda ku buvuzi, kubungabunga ibidukikije, kubaka ibikorwa remezo, kubaka amashuri n’amarerero, ubworozi, kubakira imiryango itishoboye no kuremera amakoperative.

Minisitiri Dr. Biruta yavuze ko iyi gahunda ari igihamya cy’ubwitange n’ubushake bwo gukomeza guteza imbere umutekano, imibereho myiza y’abaturage no kwihutisha iterambere ry’igihugu.

Ibi kandi byanagarutsweho na Minisitiri w’Ingabo Juvenal Marizamunda, ubwo yatangizaga ku mugaragaro ibikorwa by’Ingabo z’Igihugu na Polisi y’u Rwanda byo kubaka ibyumba by’amashuri 10, inyubako z’ubuyobozi na laboratwari ku Ishuri rya Kigese Technical Secondary School mu Murenge wa Rugalika, Akarere ka Kamonyi mu Ntara y’Amajyepfo.

Yavuze ko iki gikorwa kiri muri gahunda y’ibikorwa by’Ingabo na Polisi by’ u Rwanda byo gufasha mu iterambere n’ imibereho myiza y’ abaturage byatangijwe mu gihugu hose.

Minisitiri w’Ingabo Marizamunda, avuga ko iyi gahunda ngarukamwaka ihuza Inzego z’umutekano, abayobozi b’Inzego z’ibanze n’abaturage, hagamijwe gushimangira ubufatanye hagati y’abaturage n’inzego za Leta.

Yashimangiye ko umutekano n’iterambere bijyana, kandi ko umutekano urambye udashoboka hatabayeho uruhare rugaragara rw’abaturage.

Minisitiri w’Uburezi, Joseph Nsengimana, ari kumwe n’Umuyobozi Mukuru wungirije wa Polisi y’u Rwanda (DIGP) ushinzwe ubutegetsi n’abakozi, DCG Jeanne Chantal Ujeneza, bashyize ibuye ry’ifatizo ahazubakwa ibyumba by’amashuri 15 mu Rwunge rw’Amashuri rwa Rwankuba mu Murenge wa Kinyinya mu Karere ka Nyarugenge mu Mujyi wa Kigali.

Nsengimana yavuze ko iki gikorwa ari intambwe ikomeye mu guteza imbere ireme ry’uburezi, kandi ko ibi byumba bizafasha abanyeshuri kwiga neza ndetse n’abarezi bagatanga uburezi bufite ireme.

Ni ingingo yagarutsweho ubwo yatangizaga ibikorwa by’Ingabo z’u Rwanda na Polisi y’u Rwanda byo gufasha abaturage mu mibereho myiza n’iterambere.

Mu karere ka Gatsibo, Umurenge wa Ngarama, mu mudugudu wa Kabeho, habereye igikorwa kijyanye no gutangiza Gahunda y’Ibikorwa by’ Ingabo na Polisi by’ u Rwanda mu guteza imbere imibereho myiza y’Abaturage. Abitabiriye bagize uruhare mu gikorwa cyo gutera ibiti kigamije kurengera ibidukikije.

Umugaba Mukuru w’Ingabo z’u Rwanda Gen. Mubarakh Muganga, yashishikarije abaturage bo mu Karere ka Gatsibo mu Murenge wa Ngarama mu Ntara y’Iburasirazuba kugira uruhare rugaragara mu bikorwa byo kubungabunga ibidukikije no guteza imbere igihugu.

Umuyobozi Mukuru wa Polisi y’u Rwanda CG Felix Namuhoranye, ari kumwe n’Umuyobozi w’Ingabo wa Division ya Gatatu, Maj Gen Eugène Nkubito, bashyize ibuye ry’ifatizo ahagiye kubakwa inzu 30 z’imiryango itishoboye mu Murenge wa Bigogwe mu Karere ka Nyabihu.

CG Namuhoranye yashimiye abaturage kubera ubufatanye bwabo bukomeye n’inzego z’umutekano mu gukomeza kubungabunga umutekano mu gihugu.

Yagize ati: “Dutangije iyi gahunda dufatanyije n’abaturage kuko kurinda igihugu bijyana no kwita ku mibereho myiza y’Abanyarwanda. Ni yo mpamvu twahisemo ibikorwa bifatika, bigira umumaro mu buzima bwabo bwa buri munsi kugira ngo umuturange ahore ku isonga aho ari hose.”

Ibikorwa by’Ingabo z’igihugu na Polisi y’u Rwanda mu 2025 byasize hakozwe byinshi, harimo abaturage barenga ibihumbi 30 bahawe serivisi z’ubuvuzi ku ndwara zitandukanye, hubakwa inzu 70 zihabwa abatishoboye, ibiraro 13, hanubakwa ibyumba by’amashuri y’incuke 10 n’ibindi.

Amafoto: Internet

Ba uwa mbere mu kumenya amakuru agezweho!!!