U Rwanda rwasohoye amabwiriza mashya agenga uburyo bwo gutanga uruhushya ku bigo bitanga serivisi zo kubika no guhererekanya inyandiko z’agaciro (Central Securities Depositories- CSDs), mu rwego rwo guteza imbere isoko ry’imari n’imigabane. 

Ayo mabwiriza yasohotse muri Igazeti ya Leta Idasanzwe yo ku wa 16 Mutarama 2026.

Aya mabwiriza agenga gutanga uruhushya ku bakora ibikorwa byo kubika no gucunga inyandiko z’agaciro ndetse no kwemerera abafatanyabikorwa babo, asobanura ibisabwa ku bigo bishinzwe kubika, no guhererekanya inyandiko z’agaciro (securities). 

Atanga amategeko asobanutse agamije kunoza imikorere no guteza imbere icyizere mu isoko ry’imari n’imigabane mu Rwanda.

Nk’uko biteganywa mu ngingo ya 3, “Nta muntu wemerewe gukora ibikorwa bya Central Securities Depository atabiherewe uruhushya rutangwa n’Urwego rushinzwe Isoko ry’Imari n’Imigabane (CMA).” 

Iyi ngingo igamije kwemeza ko ari ibigo byemewe n’amategeko gusa bishobora gucunga ibikorwa remezo by’ingenzi mu rwego rw’imari.

Aya mabwiriza azana ibikorwa bya CSD mu murongo w’igenzurwa ku mugaragaro, bikajyana n’intego y’u Rwanda yo kugira isoko ry’imari rinoze kandi rifite umwanya ukomeye mu karere mu bijyanye na serivisi z’imari.

Karekezi Ngabonziza, Umuyobozi Mukuru w’Agateganyo w’Urwego rw’Isoko ry’Imari n’Imigabane (CMA), yagize ati: “Iyi ntambwe igaragaza ubushake bw’u Rwanda mu gushyiraho isoko ry’imari ryizewe. Ifungura amarembo yo kwagura uruhare rwa benshi kandi ikongerera isoko imbaraga n’ubudahangarwa.”

Nk’uko biteganywa mu ngingo ya 21, abahawe uruhushya bagomba gushyiraho uburyo bwo kugenzura imikorere no gucunga ingaruka, hagamijwe kurinda ubunyangamugayo bw’ikorwa ry’inyandiko z’agaciro.

Amabwiriza arambuye aboneka mu Igazeti ya Leta, ushobora kuyasoma kuri uru rubuga: Igazeti ya Leta Idasanzwe yo ku wa 16.01.2026 (PDF)

Ba uwa mbere mu kumenya amakuru agezweho!!!