Minisiteri y’Ubuzima muri Kenya yatangaje ko umuntu wa mbere wanduye icyorezo cya Ebola yo mu bwoko bwa Bundibugyo yabonetse muri iki gihugu, ahita apfa.

Byatangajwe na Minisitiri w’Ubuzima muri icyo gihugu, Aden Duale mu kiganiro n’abanyamakuru cyabaye kuri uyu wa kabiri, tariki ya6 Ukwakira 2026.

Minisitiri Duale yavuze ko uyu murwayi yaraye yitabye Imana nyuma y’iminsi itatu ageze i Nairobi avuye muri Repubulika Iharanira Demokarasi ya Congo, aho yari amazeyo imyaka irindwi.

Uyu muyobozi yakomeje avuga ko kugeza ubu, nibura abantu 28 ari bo bamaze kumenyekana nk’abahuye n’uwo murwayi, barimo abo mu muryango we ndetse n’abakozi bo mu rwego rw’ubuzima.

Inzego z’ubuzima muri iki gihugu zakomeje gushakisha abandi bagenzi 23 bari kumwe n’uwo murwayi mu ndege imwe, mu rwego rwo kumenya no gukurikirana abantu bose bashobora kuba barahuye na we ngo bitabweho n’abaganga hirindwa ko icyo cyorezo cyakwirakwira.

Ebola ya Bundibugyo yatangajwe bwa mbere muri RDC tariki ya 15 Gicurasi 2026. Kugeza ku wa 28 Nzeri, byemejwe ko hari hamaze kwandura abantu 8 067, mu gihe 3 901 muri bo bamaze guhitanwa n’iki cyorezo.

Virusi ya Bundibugyo itera iki cyorezo itandukanye n’’iy’ubwoko bwa Zaïre bwateye ibyorezo byinshi bikomeye bya Ebola mu bihe byashize.

Iki cyorezo cyanageze muri Uganda, kugeza ku wa 23 Kamena gusa ku wa 26 Kanama, Ishami ry’Umuryango w’Abibumbye ryita ku Buzima (OMS) ryatangaje ko icyorezo cya Ebola cyari cyagaragaye muri icyo gihuhu cyarangiye.

Ku rwego rwa Afurika iki Cyorezo kiri ku mwanya wa kabiri mu byorezo bya Ebola byahitanye abantu benshi nyuma y’ikibasiye Afurika y’Uburengerazuba hagati ya 2014 na 2016 aho abarenga ibihumbi 28 600 banduye Ebola mu gihe abarenga ibihumbi 11 bahitanwe nacyo mu bihugu bya Guniea, Liberia na Sierra Leone.

Ba uwa mbere mu kumenya amakuru agezweho!!!