Kepler WBBC yatsinze REG WBBC amanota 51-44 mu mukino wa gatanu mu ya nyuma ya kamarampaka y’icyiciro cya mbere muri Basketball y’abagore, ikoza imitwe y’intoki ku Gikombe cya Shampiyona.

Uyu mukino w’ishiraniro wabaye ku mugoroba wo kuri uyu wa Gatanu tariki ya 29 Kanama 2025, muri Petit Stade.

Amakipe yombi yagiye gukina uyu mukino anganya itsinzi ebyiri, buri kipe isabwa gutsinda kugira ngo yongere amahirwe yo kwegukana igikombe cya shampiyona.

Umukino watangiye wihuta uryoheye ijisho abarimo Nelly Sandra Nsanzabangwa na Odile Tetero batsinda amanota ku mpande zombi.

Agace ka mbere cyarangiye Kepler WBBC yatsinze REG WBBC amanota 18-13.

Ikipe ya Kaminuza ya Kepler yakomeje kongera amanota mu gace ka kabiri ibifashijwemo Traore Aichata, Nelly Sandra Nsanzabaganwa na Uwimpuhwe Henriette ndetse ikinyuranyo kiba 29-16.

Mu minota itatu ya nyuma, Ikipe y’ikigo cy’Igihugu gishizwe ingufu yagerageje kugabanya ikinyuranyo binyuze muri Umunezero Ramla watsinze amanota atatu yikurikiranya ariko biranga kuko na Kepler nayo yatsindaga.

Igice cya mbere cyarangiye Kepler WBBC iyoboye umukino n’amanota 34 kuri 25 ya REG WBBC.

REG WBBC yagarukanye imbaraga nyinshi mu gace ka gatatu itangira kugabanya ikinyuranyo ibifashijwemo na Tetero Odile na Akon Rose Paul Macuei, mu minota ibiri gusa amakipe yombi anganya 34-34.

Habura iminota itanu Kepler WBBC yongeye kugaruka mu mukino itangira gutsinda amanota binyuze muri Young Desi-Rae Yvonne na Nelly Sandara Nsanzabaganwa.

Aka gace karangiye Kepler WBBC ikomeje kuyobora umukino n’amanota 42-39.

Mu gace ka nyuma, Kepler WBBC yakomeje gukina neza yongera ikinyuranyo ibifashijwemo na Akaliza Ange Nelly watsinze amanota atatu yikurikiranya.

Umukino warangiye Kepler WBBC itsinze REG WBBC amanota 51-44 mu mikino ya nyuma ya kamarampaka muri Shampiyona ya Basketball biyongerera amahirwe yo kwegukana igikombe cya shampiyona.

Muri uyu mukino Nelly Sandra Nsanzabaganwa wa Kepler WBBC ni we watsinze amanota menshi 14.

Umukino wa gatandatu uteganyijwe ku Cyumweru, tariki 31 Kanama 2025 saa kumi n’ebyiri n’igice muri Petit Stade, aho Ikipe ya Kaminuza ya Kepler isabwa gutsinda ikegukana igikombe cya shampiyona ku nshuro ya mbere mu mateka yayo.