Kiyovu Sports yatsinze Etincelles FC ibitego 2-1 mu mukino w’umunsi wa 10 wa shampiyona yongera kubona intsinzi yatumye iva ku mwanya  wa nyuma ku rutonde rwa shampiyona rw’agateganyo.

Uyu mukino wabaye kuri uyu wa Gatanu tariki 22 Ugushyingo 2024, kuri Kigali Pele Stadium.

Watangiye amakipe yombi yigana, byatumaga ugenda gake. Uburyo bwa mbere bw’igitego bwabonetse ku munota wa 15, ku mupira Nizigiyimana Karim Mackenzie yahinduye, Masengwo Tansele awuteye uca hanze gato y’izamu.

Ku munota wa 22, Etincelles FC yazamukanye umupira neza, Tuyishimire Jean Marie Vianney awuhinduye imbere y’izamu usanga Sumailla Moro awutera hanze gato y’izamu.

Mu minota 30, amakipe yombi yatangiye kugerageza uburyo bw’ibitego ariko ubukanganye bwari butaraboneka.

Mu minota ya nyuma y’igice cya mbere, Kiyovu Sports yasatiriye cyane ibona koruneri nyinshi ariko igitego kirabura.

Igice cya mbere cyarangiye amakipe yombi anganyije ubusa ku busa.

Mu gice cya kabiri Kiyovu Sports yagarukanye imbaraga ikomeza gusatira izamu rya Etincelles maze ku munota wa 49 itsinda igitego cya mbere cyatsinzwe na Ishimwe Kevin ku mupira wari uvuye kuri coup franc yatewe na Masengo.

Ku munota wa 60, Etincelles FC yatangiye gusatira bikomeye ishaka igitego cyo kwishyura ariko Urucaca rukugarira neza.

Mu minota 70, Kiyovu Sports yakiniraga inyuma cyane ariko yugarira neza kuko Etincelles itabashaga kumeneramo.

Etincelles FC yihariraga umupira cyane ariko ugakinirwa mu kibuga hagati kuko nta buryo bw’ibitego bukomeye yabonaga.

Ku munota wa 82, Etincelles FC yabonye igitego cyo kwishyura cyatsinzwe na Niyonkuru Sadjat ku makosa y’umunyezamu Ishimwe Patrick wari uhagaze nabi.

Mbere y’uko umukino urangira Umusifuzi wa kane yongeyeho iminota itanu y’inyongera

Ku munota wa 90+5, Kiyovu Sports yabonye igitego cya kabiri cyatsinzwe na Mbonyingabo Regis Kuri Coup franc.

Umukino warangiye Kiyovu Sports Itsinze Etincelles FC ibitego 2-1 yongera kubona itsinzi, Iva ku mwanya wa nyuma ku rutonde rwa shampiyona rw’agateganyo.

Kiyovu Sports yafashe umwanya wa 15 n’amanota atandatu n’umwenda w’ibitego 13.

Kiyovu Sports yahagaritse urugendo rw’imikino irindwi yikurikiranya yari imaze idatsinda muri shampiyona, iheruka gutsinda ku munsi wa mbere wa Shampiyona itsinda AS Kigali ibitego 2-1 tariki 21 Kanama 2024.

Indi mikino iteganyijwe ku wa Gatandatu tariki 23 Ugushyingo 2024

Marine FC izakira Police FC saa cyenda z’amanywa kuri Stade Umuganda

Gasogi United izakira Musanze FC saa cyenda z’amanywa kuri Kigali Pele Stadium

Bugesera FC izakira Vision FC saa cyenda z’amanywa kuri Stade ya Bugesera

APR FC izakira Muhazi United saa kumi n’ebyiri z’umugoroba kuri Kigali Pele Stadium