Abayobozi b’inzego z’ibanze mu Karere ka Kicukiro mu Mujyi wa Kigali, bagaragaza ko hakiri imbogamizi z’ahagaragara abaturage bakennye bityo bakiyemeza ko bagiye kwita ku bibazo by’abaturage hagamijwe guhangana n’ikibazo cy’ubukene.

Umuyobozi Nshingwabikorwa w’Akarere ka Kicukiro, Antoine Mutsinzi, yavuze ko aka Karere gafite imbogamizi k’uduce tugaragaramo abaturage bakennye.

Yabigarutseho kuri uyu wa Kabiri tariki 09 Ukuboza 2025, mu nama nyunguranabitekerezo yahuje abayobozi mu nzego zitandukanye kugera k’urwego rw’Umudugudu.

Ni inama yari igamije kurebera hamwe ibimaze kugerwaho mu guteza imbere imiyoborere myiza, umutekano, ubukungu, imibereho myiza, ibikorwa remezo ndetse no gufata ingamba ku mbogamizi zikigaragara.

Mutsinzi yavuze ko imvugo ‘Umuturage ku isonga’ yava mu magambo ikajya mu bikorwa anasaba abayobozi mu nzego zitandukanye muri aka Karere kunoza serivisi ibyafasha abaturage kuva mu bukene.

Yagize ati: “Iyo turebye ishusho rusange y’Akarere kacu, tubona ko hari urwego tumaze gutera mu miyoborere, ubukungu, ibikorwa remezo ndetse n’imibereho myiza gusa haracyari imbogamizi kuko hari ahakigaragara abaturage bakennye, gusa muzi ko ubuyobozi bukuru bw’igihugu cyacu bwadushyiriyeho uburyo bwo gufasha abaturage kwikura mu bukene mu buryo burambye kandi rwose iyi gahunda irimo kugenda neza dufatanyije n’abafatanyabikorwa b’Akarere”.

Ubuyobozi bw’Akarere ka Kicukiro bushima uruhare rw’abayobozi b’Imidugudu n’abajyanama bagize mu bukangurambaga bwatumye abaturage bishakamo ibisubizo byo kwiyubakira imihanda migenderano yubakwa hirya no hino mu Midugudu, yiyubakiwe n’abaturage ku kigero cya 100%.

Ubushashashatsi buheruka gukorwa n’Urwego rw’Igihugu rw’Imiyoborere, RGB, (Citizen Report Card, CRC, 2025) bugaragaza ko mu  Karere ka Kicukiro, igipimo cy’imiyoborere n’imitangire ya Serivisi kiri kuri 79.57%.

Ubu bushakashatsi kandi bushyira Akarere ka Kicukiro ku mwanya wa mbere ku rwego rw’Igihugu mu guteza imbere Isuku, Imibereho y’umuryango Nyarwanda, Urwego rw’abikorera, Uburezi, Ababona amazi meza aho batuye, Serivisi zitangwa n’inzego z’ibanze ndetse  n’ibikorwaremezo.

Umuyobozi w’Umujyi wa Kigali Samuel Dusengiyumva yibukije abitabiriye inama gushyira imbaraga mu gukangurira abaturage kugira uruhare muri gahunda za Leta nko gutera ibiti kugira isuku aho abantu batuye, aho bakorera ndetse no ku mihanda, ibyo bigakorwa bihereye ku muyobozi bikagera ku muturage.

Ubukene mu bice by’imijyi bugeze kuri 16,7% mu gihe mu bice by’icyaro bugeze kuri 31,6%. Ubukene bukabije mu mijyi buri kuri 3,1% mu gihe mu byaro bugeze kuri 6,4%.

Ubushakashatsi bwa karindwi ku Mibereho y’Ingo muri Rusange (EICV7) bwakozwe mu mezi 12 ya 2024, bwagaragaje ko ubukene mu Rwanda bwagabanyutse, buva kuri 39,8% mu 2017, bugera kuri 27,4% mu 2024, mu gihe ubukene bukabije bwageze kuri 5,4% buvuye kuri 11,3% mu 2017.

Ba uwa mbere mu kumenya amakuru agezweho!!!