Ndagijimana Felecien w’imyaka 45 y’amavuko, yafatiwe mu cyuho amaze kwiba moto y’uwitwa Nsengiyumva Severien w’imyaka 24 y’amavuko yari iparitse ku iguriro (Alimentation) iherereye mu Mudugudu wa Rebero, Akagari ka Gako, Umurenge wa Masaka mu Karere ka Kicukiro.

Polisi ikorera mu Karere ka Kicukiro icuga ko uwo mugabo yahengereye uwo mumotari agiye gushaka icyo kurya saa tanu z’ijoro, ahita asunika iyo moto arayitwara nyirayo ashotse arayibura.

Nsengiyumva yahise atabaza inzego z’umutekano, hatangira ibikorwa byo gushakisha iyo moto, maze afatwa ari gusunika iyo moto mu muhanda.

Akimara gufatirwa mu cyuho yakubise ya moto yasi arirunkanka, inzego z’umutekano zimwirukaho ziramufata, yemera ko yari ayibye.

Moto yasubijwe ny’irayo, naho uwari uyubyibye afungiye kuri Sitasiyo ya Polisi ya Masaka mu gihe ategereje gushyikirizwa ubutabera.

Umuvugizi wa Polisi mu Mujyi wa Kigali CIP Wellars Gahonzire, yatangaje ko Polisi yahagurukiye abajura biba ibinyabiziga cyane cyane moto zibwa abamotari, anakangurira abamotari kujya baparika ahantu hagaragara, hafite umutekano, kuko hari ubwo baparika moto aho babonye bakigira mu zindi gahunda bikaba byaha icyuho abajura.

CIP Gahonzire yasabye abamotari kujya bakorana n’Inzego z’umutekano mu gutahura abanyabyaha cyane cyane abajura, abacuruza ibiyobyabwenge, ndetse n’abakora ibikorwa bihungubanya umutekano n’ituza by’abaturage.

Abamotari kandi barasabwa kujya bitondera bamwe mu bo batwara kuko hari igihe baba ari abajura cyangwa izindi nkozi z’ibibi. Ati: “Ugize amakenga wahamagara Polisi cyangwa izindi nzego z’umutekano zikabikurikirana. Abajura nibashake ibindi bakora kuko uyu mwuga mubi ntuzabahira.”

Ba uwa mbere mu kumenya amakuru agezweho!!!